Elmedia basylymy óziniń derekkózderine súıenip, Polshada ustalǵan Qazaqstan dıplomatynyń esimi Ánýar. B ekenin jazdy, dep habarlaıdy aqshamnews.kz
Ol Qazaqstannyń Ýkraınadaǵy elshiliginde áskerı attasheniń kómekshisi bolyp bir jarym jyl jumys istegen. Onyń Ýkraına aýmaǵynda ǵana dıplomatıalyq ımýnıteti bolǵan. Polsha kúshtik qurylymdarynyń ony óz aýmaǵynda ustaýyna eshqandaı kedergi bolmaǵan.
11 tamyzda Polsha arnaıy qyzmeti «tyńshylyq jasady» degen kúdikpen Qazaqstannyń Ýkraınadaǵy elshiliginde áskerı attashe kómekshisi bolǵan adamdy ustaǵany týraly aqparat taraǵan.
30 shildede Polsha bıligi Bydgosh qalasynda Ortalyq Azıa elderiniń biriniń syrtqy barlaý qyzmetiniń ofıseri ustalyp, úsh aıǵa qamaýǵa alynǵany týraly habarlaǵan. Biraq naqty qaı eldiń azamaty ekeni týraly aıtylmaǵan.
Bul jaǵdaıǵa baılanysty Qazaqstannyń resmı organdary ázirge eshqandaı aqparat taratqan joq.