Almatyda áleýmettik qoldaýdy kúsheıtip, jumyspen qamtý baǵdarlamalary men Eńbek mobıldiligi ortalyǵynyń jumysyna kóp kóńil bólinip otyr. Óńirlik komýnıkasıalar qyzmetinde ótken brıfıńte Jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasov osylaı dep málimdedi.
Qańtar men shilde aralyǵynda Eńbek mobıldiligi ortalyǵyna 46 myńnan astam almatylyq júginse, onyń 38,6 myńy jumyssyz mártebesin alǵan. Jumyspen qamtýǵa baılanysty belsendi is-sharalarǵa 24 447 adam tartyldy.
Bastaýysh kásipkerler de qoldaýǵa ıe boldy: 169 adam 1,5 mln teńge kóleminde memlekettik grant aldy. Onyń 61,5%-yn kópbalaly otbasylar, qalǵanyn múgedektigi bar adamdar men múmkindigi shekteýli balalary bar otbasylar qurady.
Kásibı oqytýdyń mańyzy zor: 5,2 myń adam «Bastaý Bıznes» baǵdarlamasy men skills.enbek.kz platformasy arqyly oqýdan ótti. 524 jumyssyz azamat jańa mamandyq alyp, mindetti túrde jumysqa ornalastyryldy. Olardyń 215-i oqý ortalyqtarynda, 309-y jumys berýshilerdiń jumys ornynda tájirıbeden ótken. Baǵdarly baǵyttaǵy is-sharalar 26 myń oqýshyny, stýdentti jáne jumyssyzdy qamtydy.
Inklúzıvti ortany damytý aıasynda «JOBCOACH» jobasy iske qosyldy. Ol múgedektigi bar adamdardy jumysqa ornalastyryp, jumysqa beıimdelýge kómektesedi. 2025 jyly osy jobamen 300 adamdy qamtý, al 2030 jylǵa deıin 4 200 erekshe qajettiligi bar azamatty qoldaý josparlanyp otyr.
Jastarǵa arnalǵan «Jastar praktıkasy» baǵdarlamasy jumys isteıdi. Bul — 35 jasqa deıingi, mamandyǵy boıynsha tájirıbesi joq joǵary oqý orny túlekterine arnalǵan aqyly taǵylymdama. Tájirıbe merzimi – bir jylǵa deıin, aı saıynǵy tólem – 30 AEK (117 960 teńge). Jyl basynan beri baǵdarlamaǵa 361 jas qatysyp, olardyń kóbi tájirıbe alǵannan keıin turaqty jumysqa ornalasqan. Almatyda jastardy jumysqa ornalastyrý, kásibı baǵdar berý, kásipkerlikti damytýǵa kómek kórsetý men kovorkıng alańdaryn usyný boıynsha 11 jastar komúnıtı-ortalyǵy jumys isteıdi.
2025 jyly Almatyda 22 497 jumys orny quryldy, onyń ishinde 11 400-i turaqty jumys orny. Bul óz kezeginde jumyssyzdyq deńgeıin 2024 jyldyń birinshi toqsanyndaǵy 4,7%-dan 2025 jyldyń birinshi toqsanynda 4,5%-ǵa deıin tómendetýge múmkindik berdi.
«Bul — respýblıkalyq ortasha kórsetkish deńgeıi», – dedi basqarma basshysy Baýyrjan Jaýbasov.