Almatyda tyldyq jáne materıaldyq-tehnıkalyq qamtamasyz etý quramalary men bólimderi komandırleriniń orynbasarlarymen úsh kúndik oqý-ádistemelik jıyn ótti.
Jıyn Qurlyq áskerleri áskerı ınstıtýtynyń «Álı» oqý-jattyǵý polıgonynda jáne Ulttyq ulannyń jaýyngerlik jáne ádistemelik daıarlyq ortalyǵynda uıymdastyryldy, dep habarlaıdy almaty-akshamy.kz. Shara barysynda dárister oqylyp, is júzindegi sabaqtar ótti jáne dene shynyqtyrý synaqtary tapsyryldy.
«Álı» oqý-jattyǵý polıgonynda tyl elementterin óristete otyryp, dalalyq jaǵdaıda materıaldyq qamtamasyz etý rotasynyń arnaıy-taktıkalyq oqý-jattyǵýy ótkizildi. Qarýly kúshter túrleriniń, ásker tekteri men óńirlik qolbasshylyqtardyń tyl mamandary arasynda ózara is-qımyldyń uıymdastyrylýyna, qujattardyń durys resimdelýine nazar aýdaryldy.
Qurlyq áskerleriniń áskerı ınstıtýtynda Qorǵanys mınıstriniń orynbasary general-leıtenant Muhamedjan Talasov jıynǵa qatysýshylarmen kezdesip, jeke quramǵa Qarýly kúshterdiń tylyn damytýdyń negizgi baǵyttaryn jetkizdi.
– Tyldyq qamtamasyz etý júıesin ortalyqsyzdandyrý sheńberinde óńirlik qaǵıdatty negizge alý týraly sheshim qabyldandy. Tyl qyzmetin osylaı uıymdastyrýdyń ózindik artyqshylyqtary bólimshelerdiń qajettilikteri men talap-tilekterin bilýde, qyzmettiń jedel oryndalýynda aıqyn kórinedi, – dep atap ótti mınıstrdiń orynbasary.
Jıyn Qarýly kúshterdiń Tyl bastyǵy polkovnık Arman Mansurovtyń basshylyǵymen Qarýly kúshter túrleri bas qolbasshylarynyń orynbasarlaryn, ásker tekteriniń, óńirlik qolbasshylyqtar qolbasshylarynyń tyl jónindegi orynbasarlarynyń qatysýymen ótti.
Polkovnık Arman Mansurov jedel, jumyldyrý jáne jaýyngerlik daıarlyq is-sharalarynyń tyldyq qamtamasyz etilýin qorytyndylady.
Qurlyq áskerleri áskerı ınstıtýtynyń bazasynda dóńgelek ústel otyrysy ótti. Onda tyldy qamtamasyz etýdiń ózekti máseleleri talqylanyp, qyzmetti uıymdastyrýdy jaqsartý jóninde usynystar da sóz boldy.
Tyldyq qamtamasyz etý kafedrasynyń kýrsanttaryna tájirıbelik sabaqtar uıymdastyryldy. Dalalyq naýbaıhanada azyq-túlikti baqylaý júrgizilip, nan pisirildi. As mázirin jasaý, taǵam daıyndaý sapasyn tekserý jáne baǵalaý tártibi naqtylandy. Monsha-kir jýý kombınatynyń jumysy da kórsetildi. Qoımalar men bólimshelerde materıaldyq quraldardy saqtaý, janar-jaǵarmaı materıaldaryn esepke alý qaǵıdalary, sondaı-aq rotanyń sharýashylyq júrgizý tártibi túsindirildi.
Oqý-ádistemelik jıynǵa Qurlyq áskerleri áskerı ınstıtýtynyń tyldyq qamtamasyz etý kafedrasynyń júzden astam bólim komandırleriniń orynbasarlary men júzdiń ústinde kýrsanttar qatysty, 20-dan asa áskerı jáne arnaıy tehnıka jumyldyryldy.
Atalmysh shara ofıserlerdiń kásibı daıarlyq deńgeıin, tyl bólimsheleriniń úılesimdiligin arttyrýǵa baǵyttalǵan.