Aldymen halyq kókeıinde júrgen suraqtardy daıyndap Prezıdentimiz Qasym-Jomart Toqaevtan oıly da mazmundy, parasatty da salıqaly suhbat alǵany úshin «Egemen Qazaqstan» gazetiniń basshysy, kórnekti ǵalym Dıhan Qamzabekke kóp rahmet aıtamyz.
Al osy kólemdi suhbat týraly pikirimdi 4-shi suraqtan bastaǵaly otyrmyn. Bul suraqta jýrnalıs jurt aıtyp júrgen qosarlanǵan bılik júıesi týraly áńgime qozǵaıdy. Óz basym Prezıdentimizdiń bergen jaýabyna tolyq qanaǵattandym.
Óıtkeni 2022 jylǵy 5 qańtarǵa deıin bizde qosarlanǵan bılik bolǵanyn kim bilmeıdi. Qasym-Jomart Kemeluly osy máseleni egjeı-tegjeıli túsindire kelip, «Elimizde Prezıdent ári Joǵary Bas qolbasshy laýazymy bir bólek, burynǵy Prezıdent ıelengen qaýipsizdik Keńesiniń Tóraǵasy laýazymy bir bólek boldy...», «Keıbir laýazymdy tulǵalardyń, onyń ishinde burynǵy Ádilet Mınıstiriniń mártebe jaǵynan Elbasy Prezıdentten joǵary turatynyn aıtqany esińizde shyǵar...» dep shyndyqty jaıyp salady.
2022 jyldyń 5 qańtaryna deıin eldegi bıliktiń jaǵdaıy solaı bolatyn. Al 5 qańtar kúni televızordan sóılegen Prezıdent búginnen bastap qaýipsizdik keńesiniń Tóraǵasy mindetin óz moınyna alatynyn jáne eshqaıda ketpeıtinin halyqqa jarıalady. Osy málimdemeni estigende óz basym qatty qýanyp qalyp edim. Alaıda el basyna túsken qaterli shaqta Prezıdentke qysym jasalǵany keıin belgili boldy ǵoı. Bolashaqta anyqtalatyn shyǵar, bálkim sol kezde aldyna kelgen qara nıetti jandardyń tarapynan, «bılikti tastap ket» dep kúsh te kórsetilýi múmkin ǵoı. Alaıda basyn qaýip-qaterge tigip turyp, eli men jerin memlekettik tóńkeristen aman alyp qalǵan Qasym-Jomart Kemelulynyń bul sheshimin erlikke para-par emes dep kim aıta alady?!
Elimizdiń táýelsizdigi men egemendigine tóngen qaýipke jalǵyz ózi qarsy turǵan Prezıdent myna suhbatynda aıtqanynan qaıtpaıtyn azamat retinde halyqtyń nazaryn taǵy bir mańyzdy máselege aýdarady: «Prezıdent laýazymyna bir-aq ret saılaný týraly ereje eshqashan ózgermeıdi. Bul talap memleketimizdiń táýelsizdigi, birtutastyǵy, aýmaqtyń tutastyǵy jáne basqarý týraly normalar sıaqty myzǵymastaı etip bekitilgen» dep kesip aıtty.
Suhbatty oqyp otyryp Saıası jańǵyrý jyl saıyn qarqyn alyp kele jatqanyn bilemiz. Aıtalyq osy jyldary aty da zaty da túbegeıli ózgergen Konstıtýsıalyq sot qalpyna keldi. Endi «Konstıtýsıalyq Sot sheshimderiniń kúshin eshkim joıa almaıdy. Onyń sheshimderine, sonyń ishinde azamattardyń Konstıtýsıalyq quqyqtaryna qatysty baılamdaryna kúmán keltirýge Prezıdenttiń de esh qaqysy joq...» - dep tujyrymdaıdy Prezıdent. Bárekeldi, bundaı reformalar buryn-sońdy bolyp pa edi!?
Halyq elde bolyp jatqan jańalyqtardy bilip otyrýǵa tıis, alaıda kóbine kerisinshe eshteńeden habarsyz qalady. Mysaly, syrtqa ketken aqshany qaıtarý kerek dep opozısıa kúni búginge deıin qaqsaýda. Al shyndyǵynda, bul ózekti másele 2019 jyly saıası reformalar bastalǵanda qolǵa alynǵan jumys. Sol kezde olıgopolıalyq dıktatýra týraly ashyq aıtyla bastady. Ol týraly bir kezde bylaı dep jazylǵan: «Ótken jyly Qasym-Jomart Toqaev olıgopolıamen kúresti bastady. Oǵan da sebep jetkilikti Sarapshylardyń esepteýinshe, sońǵy 25 jylda elden zańsyz túrde 140-160 mlrd AQSH dollary kóleminde memlekettik aktıvter shyǵarylǵan. Elimizdiń ótken jylǵy ishki jalpy ónimi 200 mlrd AQSH dollarynan asyp tústi.
Budan tutas eldiń bir jyldyq tabysynyń úshten eki bóligi zańsyz syrtqa shyǵarylǵan dep qorytyndy jasaýǵa bolady». Myna keleli áńgimede, saıası, quqyqtyq, áleýmettik, mádenı reformalar jan-jaqty áńgime bolady. Aıtalyq, Joshy ulysynyń irgesi qalanǵanyna – 800 jyl bolatyn dataǵa oraı keń aýqymdy zertteýler qolǵa alynǵanyna qalaı qýanbaısyń. Ózimizdiń 200 tarıhshymyz, sheteldiń 60 ǵalymy jumyldyrylǵan Qazaqstan tarıhynyń kóptomdyǵyn ázirleý jumysynyń aıaqtalyp qalǵany da úlken oqıǵa ǵoı.
Prezıdent «Men qazaq eliniń jastaryna senemin» degen júrek jardy sózin únemi aıtyp keledi. Bul sózdiń aıqyn dáleli retinde jastardyń atqarýshy jáne zań shyǵarýshy bılik tarmaqtarynda qyzmet etýine jol ashatyn kólemdi sharalardy atap ótti. Sonyń eń mańyzdysy – Prezıdenttik jastar kadr rezervi.
Bul degenińiz bolashaqta eldiń ekonomıkasy men saıasatyn, mádenıeti men tarıhyn tolyq meńgergen jastar bılikke keledi degen sóz.
«Egemen Qazaqstanǵa» suqbat bermesten úsh kún buryn Prezıdetimiz Qasym-Jomart Toqaev kitap jınalǵan shkaftardyń qasynda turyp Qazaqstan halqyn Jańa jylmen quttyqtady. Sondaǵy sózinde: «Bıyl bárimiz tutas ulttyń ósip órkendeýine kýá bolamyz» dedi. Láıim solaı bolǵaı!