Fýrshet qazirgi kúni qoǵamnyń ajyramas bóligine aınaldy. Keleli basqosýlarda, konferensıa, forýmdarda sol is-shara ótip jatqan ǵımaratta dastarhan jaıylady. Adamdar ústel aınalasynda turyp tamaqtanady. Fýrshet degen sol. Iaǵnı ýaqyt ta únemdeledi, adam qarasynyń kóptiginen oryn da syıymdy bolady.
Biraq qara sýdyń ózin otyryp ishý kerek, asyǵys bolsań da tize búgip, nan aýyz tı dep jatamyz. Turǵan kúıde tamaqtaný zıan emes pe? Paıdasy bar ma? Bul saýalymyzǵa № 21 qalalyq emhanaǵa qarasty «Kemel» otbasylyq dárigerlik ambýlatorıanyń jalpy praktıka dárigeri Názıra Qýlebaeva jaýap beredi.
– Tamaqty turyp jeýge bolmaıdy dep aıtý daýly másele. Bul bireýge zıan, al bireýge kerisinshe paıdaly bolýy múmkin. Jalpy, adam tamaqty turyp jegende, ol aǵzaǵa qajet mólsherden kóp tamaq jeı alady. Asqazan sozylýy jáne bul asqazannyń letargıasyna ákelýi yqtımal. Sonymen qatar shamadan tys tamaqtaný semizdikke ákelýi múmkin. Sondaı-aq, fýrshetterde tek qatty taǵamdar beriledi, olardy muqıat shaınaý kerek. Resmı is-sharalarda adam tikesinen tik turady. Sondyqtan adam ózin úıdegidegideı jaıly emes, yńǵaısyz sezinýi múmkin. Tamaqty asyǵys, ári tolyǵymen shaınamaı jeı berýi múmkin. Bul asqazanǵa aýyrlyq túsirip, as qorytý jumysyn qıyndatady. Degenmen, turyp tamaqtanýdyń jaǵymdy jaqtary da bar. Bul asqazan qyjyly men gastroezofagealdy reflúks aýrýynyń belgilerin jeńildetýi múmkin. Óıtkeni reflúks asqazandaǵy shamadan tys qysymnan týyndaıdy. Sondaı-aq, adam turyp jegende, otyryp tamaqtanǵanǵa qaraǵanda kóbirek energıa jumsaıdy. Bul salmaq tastaǵysy keletinder úshin tıimdi. Aýyrmaıyq, aǵaıyn!