Almaty qalalyq áleýmettik ál-aýqat basqarmasynyń basshysy Názıra Toǵyzbaeva Óńirlik komýnıkasıalar qyzmetiniń brıfıńinde turmystyq zorlyq-zombylyq máselesi qalaı sheshilip jatqanyn aıtty. Ol «Jan Saıa» daǵdarys ortalyǵy qalada 2017 jyldan beri jumys jasap kele jatqanyn atap ótti. Bıyl oǵan 75 áıel men 157 bala ótinish bergen, dep habarlaıdy almaty-akshamy.kz
Atap aıtsaq, «Jan Saıa» otbasylyq zorlyq-zombylyq qurbandary úshin arnaıy jasalǵan. Munda zardap shekkenderge baspana, quqyqtyq, psıhologıalyq jáne áleýmettik qoldaý kórsetiledi. Ortalyq sonymen qatar balalarǵa arnalǵan túrli is-sharalar ótkizedi jáne «150» senim telefony bar.
Sonymen qatar, Almatyda turaqty turatyn jeri joq adamdar úshin qurylǵan «Pana» áleýmettik qyzmet kórsetý ortalyǵy jumys isteıdi. Jyl basynan beri 466 ótinish berýshige kómek kórsetildi, olardyń barlyǵy ýaqytsha turǵyn úımen qamtamasyz etildi.
«Ortalyq mamandary qujattardy qalpyna keltirýge kómektesedi. Mysaly, «Panaǵa» eshqandaı qujaty joq 67 jastaǵy er azamat júgingen. 1974 jylǵy tólqujatyn joǵaltyp alǵan. Mamandardyń kómeginiń arqasynda ol jeke kýálik alýǵa, sondaı-aq qarttyq boıynsha zeınetaqy taǵaıyndaýǵa múmkindik aldy. Qazirgi ýaqytta «Shańyraq» arnaıy qyzmetter ortalyǵyna aýystyryldy, - dedi Názıra Toǵyzbaeva.
Almatyda jalǵyzbasty zeınetkerler, múgedekter, jalǵyzbasty erli-zaıyptylar jáne zeınetkerlik jastaǵy erli-zaıyptylar úshin elimizdegi erekshe «Qamqor» áleýmettik úıi jumys jasaıdy, munda 50 adam turyp jatyr.
«Bul úı kóp qabatty, aınalasy qorshalǵan. Týystarynyń qaraýynsyz qalǵan aǵa býyn qala turǵyndary páterlerin memleket menshigine ótkizip, osy úıge kóshe alady», - dedi áleýmettik ál-aýqat basqarmasynyń basshysy.
Bul úıde turatyn zeınetkerler qyzmetkerlerdiń turaqty baqylaýynda.