Ótken jyly Almaty qalasynyń Túrksib aýdanynda zıaly qaýym ókilderiniń qatysýymen «Jeltoqsan» saıabaǵy saltanatty túrde ashylǵan bolatyn. «Jas qanat» jáne «Maıak» yqshamaýdandarynyń aýmaǵynan oryn tepken «Jeltoqsan» saıabaǵy 100 gektar jerdi alyp jatyr. Alaıda, bul alyp baq búginde qaraýsyz qalyp, aıanyshty kúıge túsip otyr.
Negizi, buryn bul aýmaq qaraýsyz qalyp, qoqysqa tolǵan jer bolatyn. Ótken jyly qala ákimdiginiń tapsyrmasymen saıabaqty odan ári damytý qolǵa alyndy. Saıabaqtyń ashylý saltanatynda Jeltoqsan kóterilisine qatysýshylar men zıaly qaýym ókilderi bul jerge qylqan japyraqty aǵashtardy – qaraǵaı, kók shyrsha jáne Tán-SHan shyrshalaryn otyrǵyzdy.
Biraq demalys ornynyń ashylǵanyna 1 jylǵa jetpeı jatyp, ishin adam boıymen birdeı aramshóp basyp ketken. Demek, qala ákimdigi qyrýar qarajat bólip saıabaqty ashqanymen, aýdan ákimdigi onyń kútimine kóńil bólmegen tárizdi. Onda otyratyn oryndyqtar tipten az, qoıylǵan bıodárethananyń ishine kirý múmkin emes. Dárethana jaǵdaıy syn kótermeıdi. Las ári ishindegi irkindiler ýaqytyly shyǵarylmaıdy. 100 gektar jerdi alyp jatqan alyp saıabaqtan nebári bir ǵana bıodárethana kórdik. Saıabaqta qydyrýshylar júgirip júr, qaıda bararyn bilmeıdi. Úlgergeni dárethanaǵa bolmasa taldyń arasyna barady.
Oǵan qosa, saıabaq aýmaǵynda arnaıy qoqys salatyn jáshikter de kóp emes. Kelýshiler ishken-jegenin otyrǵan jerlerine tastap ketip jatady.
«Saıabaqtyń ishi óte las. Shóp qaýlap ósip ketken. Balalar bir jerin jaraqattap ala ma dep alańdaımyz. Suryqsyz saıabaqta túnge jaqyn turaqty mekenjaıy joqtar men buzaqylar, mas adamdar kóp júredi. Mundaı alyp baqty qylmys ornyna emes, laıyqty demalys ornyna aınaldyrý kerek», – deıdi Farıza esimdi kelinshek.
Ótken jyly qarashada egilgen taldar da ara-arasynda qýrap jatyr. «Taldardy otyrǵyzǵan soń qýratyp qoımaı, ýaqytymen baptap, sýǵaryp otyrý kerek qoı. Jasyl jelekti qaraı almasa, nege otyrǵyzady?», – dep nalıdy saıabaqqa kelýshiler.