Ulttyq ulannyń Túrkistan qalasynda ornalasqan 5574 áskerı bóliminde ótken Áskerı ant qabyldaý rásimi erekshe ári este qalarlyq sátterge toly boldy, - dep habarlaıdy Aqshamnews.kz.
Saltanatty shara barysynda 100-ge jýyq jas sarbaz Otan aldyndaǵy qasıetti boryshyna adal bolýǵa ant berdi.
Rásimge sarbazdardyń 250-den asa ata-anasy men jaqyndary arnaıy kelip, uldarynyń alǵashqy áskerı qadamyna kýá boldy. Bul óz kezeginde jas jaýyngerlerge rýhanı qoldaý kórsetip, saltanatty sharanyń mańyzyn arttyra tústi.
Rásimniń eń áserli sátteriniń biri — qatardaǵy sarbaz Damır Nurlanulynyń kópshiliktiń aldynda súıiktisine sóz salýy boldy. Áskerı sap túzegen alańda oryn alǵan bul erekshe oqıǵa jınalǵan qaýymǵa zor emosıa syılap, elge qyzmet etý men adamdyq sezimniń bir-birimen úılesim tapqanyn kórsetti.
Saltanatty shara barysynda áskerı bólim komandıri, polkovnık Tólegen Shynybekov jas sarbazdardy Áskerı ant qabyldaýymen quttyqtap, olarǵa júrekjardy tilegin bildirdi:
«Búgin sizder Otan aldyndaǵy azamattyq ári áskerı jaýapkershilikti sanaly túrde qabyldap otyrsyzdar. Áskerı ant — bul erlikke, tártipke jáne elge adal qyzmet etýge berilgen sert. Sizderge zor densaýlyq, qajymas qaırat, temirdeı tártip pen jaýyngerlik rýh tileımin. Árdaıym el senimin aqtap, Ulttyq ulannyń abyroıyn asqaqtata berińizder!» — dedi bólim komandıri.
Osy kúnnen bastap qatardaǵy Damır Nurlanuly jáne onyń qarýlas serikteri Túrkistan qalasynyń kósheleri men mańyzdy qoǵamdyq is-sharalar kezinde jaýyngerlik qyzmet atqarýǵa kirisedi. Olar qoǵamdyq tártip pen azamattardyń qaýipsizdigin qamtamasyz etý jolynda jaýyngerlik mindet atqarmaq.
Aıta keteıik, mundaı saltanatty rásimder jas sarbazdardyń áskerı rýhyn kóterip, patrıottyq sezimin nyǵaıta túsýge, sondaı-aq ata-ana men ásker arasyndaǵy baılanysty bekemdeýge yqpal etedi.