Almatyda jumysshy mamandyqtaryn damytý men tegin kásiptik bilim berý eńbek adamyn qoldap, jastardy jumyspen qamtýdyń negizgi tetigine aınalyp barady. Óńirlik komýnıkasıalar qyzmetinde ótken baspasóz konferensıasynda osy týraly aıtyldy. Sáýlet, dızaın jáne ınjenerıa kolejiniń dırektory Kamal Jamanǵozov jumysshy kadrlardy daıarlaý men tehnıkalyq jáne kásiptik bilim berý (TjKB) júıesin transformasıalaý qalany damytatyn mańyzdy faktor ekenin atap ótti.
Spıkerdiń aıtýynsha, qazir qala ekonomıkasy bilikti jumysshy mamandarǵa qatty táýeldi bolyp tur. Investısıalardy, osy zamanǵy tehnologıalar men úlken ınfraqurylymdyq jobalardy bul salanyń uńǵyl-shuńǵylyn biletin jaqsy mamandarsyz qolǵa alý qıyn. Sondyqtan tehnıkalyq jáne kásiptik bilim berý júıesi óńirlik saıasatta aldynǵy qatarǵa shyǵyp otyr.
"Biz dıplomǵa bola oqytatyn modelden bas tartyp, qalanyń ekonomıkasyna kerek mamandardy daıarlaýǵa kóship jatyrmyz. Qazir kolejderge de túlekterdiń sanynan góri, árqaısysynyń birinshi kúnnen bastap jumysqa daıyn bolyp, jumysqa ornalasqany mańyzdy", – deıdi Kamal Jamanǵozov.
Jumysshy kadr daıarlaýdy jumys berýshilermen birlesip qolǵa alǵan. Oqý baǵdarlamalary naqty óndiristik úderiske beıimdelip, dýaldy oqytý keńeıtilip, praktıkalyq bólim jaǵy da kúsheıtildi. Ol bıznes biliktilik talaptaryn qalyptastyrýǵa, óndiristik praktıkany uıymdastyrýǵa jáne oqý nátıjelerin baǵalaýǵa belsendi qatysyp, bilim berý men eńbek naryǵynyń arasyndaǵy alshaqtyqty qysqartýǵa múmkindik berip otyr.
"Jumys berýshiler qazir kolejderge seriktes bolyp otyr. Olar daǵdyǵa qoıylatyn talapty qalyptastyrýǵa kómektesedi, stýdentterdi tájirıbeden ótkizip, olardyń daıyndyq deńgeıin baǵalaıdy. Iaǵnı, oqý barysyn óndirispen úılestirip otyrmyz", – dep atap ótti kolej dırektory.
TjKB júıesi tereń transformasıa kezeńinen ótip jatyr. Spıkerdiń aıtýynsha, qazirgi kolej oqý orny ǵana emes, kadrlar daıarlaıtyn, eresek mamandardy qaıta daıarlaýmen aınalysatyn, jańa tehnologıalar men óndiristerdi engizýdi súıemeldeıtin quzyretter ortalyǵy. Mundaı model kolejderdi qalanyń ekonomıkalyq ınfraqurylymyna kiriktiredi.
TjKB transformasıasy Almaty ekonomıkasynyń turaqtylyǵyna tikeleı áser etedi. Kásiporyndar daıyn mamandarǵa qol jetkizip, qyzmetkerlerdi qaıta oqytýǵa ketetin shyǵyndardy azaıtady, túlekter turaqty jumyspen qamtylyp, qyzmette kásibı turǵyda ósýge múmkindik alady.
"Turaqty nátıjege memleket pen Bilim basqarmasy tarapynan júıeli qoldaý kórsetilmeı qol jetkizý múmkin emes. Materıaldyq-tehnıkalyq bazany jańartý, bıznes-pen áriptestikti damytý men kolejderdiń basqarýǵa ıkemdiligi dırektorlarǵa basqarýshy retinde senim bildirip, úılesimdi sheshimderdi qola alýdy talap etedi", – dep qosty Kamal Jamanǵozov.
Nátıjesinde, jumysshy kadrlardy daıarlaý men tehnıkalyq jáne kásiptik bilim berý júıesin transformasıalaý búginde bilim berýdi ǵana mindettep qoımaı, Almaty men tutas óńirdiń ekonomıkasyn turaqty damytýǵa baǵyttalǵan strategıalyq ınvestısıa retinde qarastyrylyp otyr.