Almaty qalalyq Tótenshe jaǵdaılar departamentiniń uıymdastyrýymen "Shymbulaq" taý-shańǵy kýrorty aýmaǵynda shuǵyl qyzmet ókilderi men álpınısik qaýymdastyq múshelerine arnalǵan bazalyq júrek-ókpe reanımasıasy (BLS) boıynsha oqý-trenıng, sheberdiń dárisi ótti. Bul týraly qalalyq Qoǵamdyq densaýlyq saqtaý basqarmasynyń ókilderi aıtty.
İs-shara qatysýshylardyń medısına qyzmetkerleri kelgenge deıin tótenshe ári shuǵyl jaǵdaıda alǵashqy kómek kórsetýge daıyndyǵyn arttyrýǵa baǵyttalǵan.
Oqý baǵdarlamasyn Jedel medısınalyq járdem qyzmetiniń BLS nusqaýshylary Perızat Aldabergenova men Aslan Sherınov júrgizdi. Sabaq barysynda olar joǵary kásibı biliktilikti, oqý úderisiniń naqty uıymdastyrylýyn jáne teorıalyq ári tájirıbelik materıaldy saýatty jetkize bilýdi aıqyn kórsetti.
Aıaq-qol synýy, bas jaraqattary, olardy der kezinde anyqtaý joldary, alǵashqy kómek kórsetý algorıtmderi men zardap shekkenderdi durys bekitý tásilderi qatysýshylardyń erekshe qyzyǵýshylyǵyn týdyrdy. Sonymen qatar qurysý ustamalary men ózge de shuǵyl jaǵdaıda atqarylatyn is-qımyldar jan-jaqty talqylandy.
"Mundaı oqý-jattyǵý sharalary taýly aımaqtaǵy qaýipsizdik deńgeıin arttyrýǵa jáne shuǵyl qyzmetter men belsendi sport túrlerimen aınalysatyn qaýym arasyndaǵy ózara yntymaqtastyqty nyǵaıtýǵa septigin tıgizedi", – dedi Almaty qalalyq Qoǵamdyq densaýlyq saqtaý basqarmasynyń ókilderi.