Ulttyq sportty ulyqtaý
Túrkistan oblysynda kóshpendiler oıyndary ótti. Jastar dástúrli sport túrlerinen jarysqa tústi, dep habarlaıdy Almaty-akshamy.kz
Qazaqtyń ulttyq oıyndarynyń ishindegi eń qyzyqtysy – aýdaryspaq. Atqa qonǵan kil myqtylar ishinen ereje boıynsha qarsylasyn qaǵyp túsirgeni jeńimpaz atanady. Sondaı-aq qoshqar kóterip, júldeli orynǵa iligýge talpynǵan jastar da tabyldy.
Bozkilemde qazaq kúresinen kúsh synasqan palýandar tartysy oıyndardyń kórkin qyzdyrdy.
«Bul – ata-babamyzdan kele jatqan sport túri. Qazaq kúresi – myń jyldyq tarıhy bar qazaqtyń brendi. Osynyń arqasynda ata-babamyz soǵysta da jeńiske jetti dep aıta alamyn. Negizi sambo, dzúdoda kúresemin, biraq qazaq kúresi óte qatty unaıdy», - deıdi palýan Islambek Ilásqajy.
Aýqymdy saıysta qazaqtyń ulttyq taǵymynan da dám tatýǵa bolady. Kıiz úıde arnaıy jaıylǵan dastarhanǵa ájeler keńesiniń máziri qoıylǵan. Kelgen qonaqtarǵa taǵamnyń túri men jasaý tehnologıasyn kórsetip, yntymaq pen birlikti úlgi etti.
«Munyń bári tatýlyqqa, yntymaqtastyqqa bastap, bir-birimizben ara qatynasymyz joǵary deńgeıde ekenin kórsetedi. Bizdiń aýdanymyz – óte tatý-tátti turatyn yntymaǵy jarasqan aýdan», - deıdi aýyl turǵyny Aqjarqyn Baqorazova.
Osylaısha kóshpendiler oıynyn uıymdastyrýshylar qazaq halqynyń mádenıeti men tarıhynyń mańyzdy bóligin saqtap qalýǵa óz úlesterin qosty. Mundaı sharalar aımaqqa týrıser tartýǵa da áser etedi.