Búgin Túrkistan qalasynyń jastary men eriktilerin jáne úkimettik emes uıymdardyń basyn qosqan alǵashqy praktıkým ótti.
İs-sharanyń negizgi maqsaty – eriktiliktiń qoǵamdaǵy mańyzyn dáripteý, túrkistandyq jastardyń azamattyq belsendiligin arttyrý jáne áleýmettik jaýapkershilik qundylyqtaryn nyǵaıtý. Sonymen qatar, eriktilerdi áleýmettik kásipkerlikke beıimdeý arqyly olardyń qarjylaı turaqtylyǵyn qalyptastyrý kózdelgen.
Praktıkým barysynda qatysýshylar áleýmettik kásipkerliktiń qyr-syrymen tanysyp, halyqaralyq jáne otandyq granttarǵa joba daıyndaý men pıchıng tásilderin úırendi. Sondaı-aq tabysqa jetýdiń naqty tájirıbeleri men uıymdyq brendıng qundylyqtary da talqylandy.
Sharaǵa Túrkistan qalasynyń ákimi Ázimbek Pazylbekuly, Túrkistan oblysy Máslıhatynyń depýtaty Inara Namazbaeva jáne óńirlik áleýmettik kásipkerler, úkimettik emes uıymnyń ókilderi men qoǵam belsendileri qatysty.
Sharada sóz alǵan Ázimbek Pazylbekuly: "eriktiliktiń qazaq halqynyń qanyna sińgen asyl dástúr" ekenin atap ótti:
"Eriktiler – qoǵamymyzdyń rýhanı tiregi. Qazaqtyń "Asar" dástúri – sonyń aıqyn dáleli. Búgingi kúni áleýmettik kásipkerlik – memleket qoldap otyrǵan, áleýmettik máselelerdi tıimdi sheshýge múmkindik beretin qýatty qural. Demek, eriktilik – tek bastama emes, áleýmettik kásipkerlikke jol ashatyn úlken tramplın", – dedi ol. Sondaı-aq ol: "Qazirgi tańda Túrkistan qalasynda 257 úkimettik emes uıym bolsa, sonyń 130-y qaladeńgeıinde tirkelgen. Bul – ashyq qoǵamnyń basty kórsetkishi. Árbir uıymnyń bastamasy men eńbegi qalamyzdyń damýyna, áleýmettik máselelerdiń sheshilýine yqpal etip otyr. Osy rette, Sizderdiń barlyq usynystaryńyzǵa qulaq asyp, qoldaýǵa árqashan daıynbyz" dedi.
Praktıkýmnyń basty spıkeri, Áleýmettik ınnovatorlar qaýymdastyǵynyń prezıdenti, "Global kishkentai" ınklúzıvti sheberhanasynyń negizin qalaýshy Gúlmıra Parmysheva Túrkistan qalasynda jastarǵa osyndaı múmkindik jasalǵany úshin alǵysyn bildirdi:
"Áleýmettik kásipkerlikti damytýǵa arnalǵan bul bastama – Túrkistan úshin úlken serpilis. Ákimdikke jáne uıymdastyrýshylarǵa qoldaý kórsetkenderi úshin zor rızashylyǵymdy bildiremin", – dedi ol.
Shara qorytyndysynda qoǵam belsendileri jastarǵa áleýmettik jobalardy júzege asyrýǵa qoldaý kórsetetinin atap ótip, qatysýshylar óz ıdeıalaryn ortaǵa saldy. Uıymdastyrýshylar mundaı praktıkýmdardy dástúrli túrde ótkizýdi josparlap otyrǵanyn jetkizdi.