«Qaırat» maýsymdaǵy basty mindetin oryndap, pleı-off kezeńiniń qarymta oıynyndaǵy jeńistiń arqasynda Chempıondar lıgasynyń negizgi kezeńine joldama aldy, - dep habarlaıdy Aqshamnews.kz.
Oıyn alǵashqy mınýttardan-aq qarqyndy bastaldy. «Seltık» jeńis úshin kelgenin jasyrmaı, alǵa umtyldy. Alaıda jas qaqpashy Temirlan Anarbekov qaqpasyn senimdi qorǵap, qarsylastardyń shabýylyna múmkindik bermedi.
Almatylyqtardyń qorǵanysy shotlandıalyqtarǵa ońaı shaǵyla qoımaıtyn qamalǵa aınaldy. Trıbýnalardan esip turǵan jankúıerlerdiń qyzý qoldaýy «qaırattyqtardy» alǵa jeteledi, tek bir dál soqqy jetpeı turdy. Joldamanyń taǵdyry eki komanda da jeńiske laıyq bolǵan naǵyz aıqasta sheshildi.
Ekinshi taımnyń aıaǵyna qaraı «Seltık» jyldam ári qaýipti qarsy shabýyl uıymdastyrdy, biraq forvard Maeda Anarbekovtiń qaqpasyn dál kózdeı almady.
Negizgi ýaqyt 0:0 esebimen aıaqtalyp, mach ekstra-taımǵa ótti. Qosymsha ýaqytta da eki komanda belsendi oınap, qaýipti sátter kezek-kezek ótti. Birde Anarbekov, birde Shmeıhel qaqpalaryn qutqaryp otyrdy.
Ekinshi qosymsha taımda shotlandıalyqtar almatylyqtardy qyspaqqa alyp, birneshe qaýipti múmkindik jasady. Biraq Anarbekov pen onyń serikteriniń janqıarlyq oıyny olardyń bar kúshin zaıa qyldy. 120 mınýttan keıin de tablodaǵy esep ózgermeı, jeńimpazdy penaltı serıasy anyqtady.
Alǵashqy soqqyny «Seltık» oryndady, biraq Anarbekov qaqpasyn aman saqtap qaldy — trıbýnalar dúr silkindi.
Gromyka tepken dop qaqpa mańdaıshasyna tıip keri qaıtty. Alaıda kóp uzamaı Anarbekov ekinshi penaltıdi de toıtaryp, Martynovıch alǵashqy gol soqty.
Úshinshi soqqyny shotlandtar dál oryndady, biraq Arad ta múlt ketken joq. Qonaqtar taǵy esepti teńestirdi.
Sorokın gol soqty. Sodan soń Anarbekov taǵy bir soqqyny qaıtardy… Esep — 3:2.
Osylaısha, «Qaırat» ÝEFA Chempıondar lıgasynyń negizgi kezeńine joldama aldy.