Atalǵan jaıtqa baılanysty mektep dırektory men 6 pedagogke tártiptik jaza taǵaıyndaldy
Túrkistan oblysynda test jaýaptaryn telefon arqyly taratqan muǵalimderge tártiptik jaza qoldanyldy, dep habarlaıdy Almaty-akshamy.kz QazAqparatqa silteme jasap.
Keshe Ordabasy aýdanyndaǵy «Toqsansaı» jalpy orta mektebinde memlekettik atestattaý ótken. Onyń barysynda ustazdar zań buzýshylyqqa jol bergen. Atap aıtqanda, Túrkistan oblysynyń Bilim salasyndaǵy sapany qamtamasyz etý departamentiniń qyzmetkerleri testileý barysynda eki oqýshynyń jasyryn túrde telefon paıdalanyp otyrǵanyn anyqtaǵan. Telefondardy ashyp qaraý kezinde pedagogterdiń daıyn jaýapty sýretke túsirip, oqýshylarǵa jiberip otyrǵany belgili boldy.
«Atalǵan jaıtqa baılanysty mekteptiń dırektory men 6 pedagog tártiptik jazaǵa tartyldy. Munyń aldynda «Toqsansaı» jalpy orta mektebi sáýir aıynda ótkizilgen memlekettik atestattaýdyń nátıjesi boıynsha 40 paıyzdan tómen kórsetkish kórsetip, atestattalmaǵan bolatyn», - dedi Túrkistan oblysynyń Bilim salasyndaǵy sapany qamtamasyz etý departamentiniń basshysy Ǵalymjan Almatov.