Májilis depýtaty Erlan Ábdıev vıse-premer – mádenıet jáne aqparat mınıstri Aıda Balaevaǵa depýtattyq saýal joldap, múgedektigi bar azamattarǵa til tıgizgen blogerlerge qylmystyq jaza qoldanýdy usyndy, - dep habarlaıdy aqshamnews.kz tilshisi.
"Keıingi aılarda qoǵamda alańdatarlyq úrdis baıqaldy. Áleýmettik jelilerde múgedektigi bar balalar men azamattarǵa qarsy qorlaý, óshpendilik tili kúsheıdi. Osydan birneshe aı buryn bloger-symaq bireý aýtızmi bar balalardy óltirýge shaqyrǵanyn bilesizder. Ol áleýmettik arazdyqty qozdyryp qana qoımaı, kópshilikti qatygezdik pen zorlyq-zombylyqqa ashyqtan-ashyq shaqyrdy. Ekinshi mysal. Kúni keshe aýtızm dertine shaldyqqan balalar men olardyń áke-sheshesine til tıgizgen taǵy da bir bloger shyqty. Ol "mundaı aýytqýy bar bala jeńil júristi shesheden týady" dep málimdedi. Onsyz da aýyr dertke shaldyqqan balalardyń ata-analaryna bul jyǵylǵanǵa judyryqtaı tıgeni anyq", - dedi depýtat.
Depýtattyń pikirinshe, "haıptyń artynda júrip, kópshiliktiń aryn taptaǵan mundaı blogerlerge ákimshilik emes, qylmystyq jaza qoldanylýy kerek".
"Áıtpese kez kelgen adam aýzyna ıe bolmaı, jazadan qutylyp, qoǵamǵa úlken zıan keltirip, emin-erkin júre bermek", - dedi ol.
Eske salaıyq, buǵan deıin bloger aýtıst balalar týraly aýyr pikir aıtqan edi. Keıin onyń isi sotta qaralyp, ol kópshilikten keshirim surady.