Almaty ákímí Darhan Satybaldy Máslıhat otyrysynda 2026–2030 jyldarǵa arnalǵan damu josparyn ūsynyp, qalanyń jalpy óńírlík ónímín 70 trln teńgege deıín jetkízu, kólík júıesín jańǵyrtu jáne ekologıyalyq jaǵdaıdy aıtarlyqtaı jaqsartu maqsatyn jarıyalady, - dep habarlaıdy aqshamnews.kz tílshísí.
Almaty qalasynyń ákímí Darhan Satybaldy 10 jeltoqsanda ótken Máslıhat otyrysynda 2026–2030 jyldarǵa arnalǵan damu jospary men 2026–2028 jyldarǵa arnalǵan byudjettí tanystyrdy. Sońǵy bes jylda qala halqy 2,3 mıllıon adamǵa deıín ósíp, ekonomıkanyń ortasha jyldyq ósímí 6,8 paıyzdy qūrady, al jūmyssyzdyq 5,2 paıyzdan 4,4 paıyzǵa deıín tómendedí.
Ákím aldaǵy bes jylda Almatynyń jalpy óńírlík ónímín ekí ese kóbeıtíp, 70 trıllıon teńgege jetkízu míndetí qoıylǵanyn aıtty. Būl úshín ekonomıkanyń naqty ósímí jyl saıyn kemínde 6 paıyz boluǵa tıís. Dástúrlí salalarmen qatar turızm, IT-sektor, kreatıvtí ındustrıyalar men óńdeushí ónerkásíp jańa ósu draıverlerí retínde belgílengen. Shaǵyn jáne orta bıznestíń JÓÓ-degí úlesín 60 paıyzdan 65 paıyzǵa deıín arttyru josparlanyp, jeńíldetílgen rejımdegí kásípkerler úshín mólsherleme 4 paıyzdan 3 paıyzǵa deıín tómendetílgení atap ótíldí.
Qala damuynyń mańyzdy baǵyty – kólík ınfraqūrylymyn jańǵyrtu. Josparǵa metrony keńeıtu, BRT jáne LRT jelílerín íske qosu, qoǵamdyq kólíktíń jańa túrlerín engízu kíredí. Būl 2030 jylǵa qaraı qoǵamdyq kólíkpen jasalatyn táulíktík sapar sanyn 1,7 mıllıonnan 3 mıllıonǵa deıín ūlǵaıtuǵa múmkíndík beredí. Sonymen qatar, bes qalalyq polıtsentr qalyptastyru arqyly tarıhı ortalyqqa túsetín júktemení azaıtyp, barlyq audandarda qalalyq ortanyń sapasyn arttyru kózdelgen.
Ekologıyalyq baǵytta №2 jylu elektr ortalyǵyn 2026 jyldyń ayaǵyna deıín gazǵa kóshíru, keıín №3 JEO-ny bu-gaz tehnologıyasyna auystyru josparlanyp otyr. Būl jylu kózderínen shyǵatyn zıyandy shyǵaryndylardy 92 paıyzǵa deıín qysqartuǵa múmkíndík beredí. Jeke sektordy gazdandyru deńgeıí qazír 99,6 paıyzdy qūrap, 2027 jylǵa qaraı 100 paıyzǵa jetkízu josparlanǵan. Ákímníń aıtuynsha, ūsynylǵan jospar Memleket basshysynyń tapsyrmalaryna saı Almaty tūrǵyndarynyń ómír súru sapasyn jaqsartuǵa baǵyttalǵan.