Vıtse-premer – mádenıet jáne aqparat mınıstrí Aıda Balaeva Orda.kz pen QazTAG-qa qatysty sot protsesteríne baılanysty málímdeme jasady, - dep habarlaıdy aqshamnews.kz tílshísí.
Vıtse-premer – mádenıet jáne aqparat mınıstrí Aıda Balaeva Qazaqstannyń medıa keńístígínde qyzu talqylanyp jatqan bírneshe sot protsesíne, sonyń íshínde Orda.kz saıty men QazTAG agenttígíne qatysty ísterge baılanysty arnaıy málímdeme jasady. Onyń aıtuynsha, Mádenıet jáne aqparat mınıstrlígí būl protsesterdí erekshe baqylauda ūstap otyr.
"Bíz úshín elímízde sóz bostandyǵynyń saqtaluy men barlyq aqparat taratyp otyrǵandardyń zań ayasynda jūmys ísteuí asa mańyzdy. Kásíbı jurnalıstıka adaldyqqa, obektıvtílíkke jáne tekserílgen aqparattyń naqtylyǵyna negízdeluí kerek. Mūndaı jaǵdaılar árdaıym medıa qauymdastyqty alańdatady. Sebebí būl sóz bostandyǵy men zańdy jurnalıstík qyzmet sekíldí asa mańyzdy máselelerge tíkeleı qatysty. Kásíbı būqaralyq aqparat qūraldary zańdy būzbaı jūmys ístegen jaǵdaıda ǵana memleket olardyń qūqyǵyn tıímdí qorǵaı alatynyn túsínuí tıís. Al eger taraptar arasyndaǵy qatynastar qūqyqtyq alańǵa auyssa, memlekettík organnyń aralasuy sotqa qysym retínde qabyldanuy múmkín. Qalaı bolǵanda da, bíz kásíbı jurnalısterge qatysty ákímshílík nemese qylmystyq ísterdíń barynsha ashyq árí obektıvtí qaraluy qajet ekenín árdaıym talap etíp kelemíz.
Sonymen qatar, ol Mádenıet jáne aqparat mınıstrlígí óz qūzyretí shegínde jurnalısterdíń qūqyǵyn qamtamasyz etuge jáne sot ísteríníń ádíl qaraluyna qajet barlyq sharany qabyldauǵa daıyn ekenín aıtty.
Mınıstrdíń būl jazbasyna QazTAG agenttígíníń basshysy Áset Mataev jauap berdí.
"Qūrmettí Aıda Ǵalymqyzy, qaıyrly tań! Sízge jaǵdaıdy dūrys bayandamaǵan sıyaqty. Ekí túrlí ístí qatar qoıyp qarastyru onsha dūrys emes. Būl ís shílde aıynda qozǵalǵan, al QazTAG-qa qatysty qylmystyq ís qarasha aıynyń sońynda, jalǵan saraptamalar negízínde jarıyalandy. Mūndaǵy zań būzushylyqtar shash etekten. "Mass-medıa turaly" jańa zańnyń 68-baby bízdí qorǵaıdy. Sebebí redaktsıya barlyq materıaldy tíkeleı bastapqy derekkózden – Freedom Finance-qa qatysty ekí qylmystyq ís boıynsha jábírlenushíler men olardyń advokatynan alyp jarıyalady. Qolymyzda beınejazbalar bar, al mátínde olardyń sózderí dáıeksóz retínde aına-qatesíz keltírílgen. Būl – olardyń tíkeleı sózí. Olar Freedom Finance qyzmetkerleríne qatysty qylmystyq ís boıynsha álí kúnge deıín jábírlenushí sanalady. Ózge BAQ-tardyń kóbínde jarnamalyq kelísímsharttar bolǵandyqtan, olar jábírlenushílerge óz alańyn ūsynbady, sol sebeptí olar bízdíń redaktsıyaǵa keldí. Al qūqyq qorǵau organdary ístí tıístí deńgeıde tergemedí. Bízge qatysty aıyptaulardyń barlyǵy tek bírjaqty, aıyptau baǵytynda qūrylǵan. Ókíníshke qaraı, Freedom Finance-tyń Qazaqstanda yqpaly bar ekení beseneden belgílí...", – dep jazdy Mataev óz arnasynda.
Eske salaıyq, bıyl jeltoqsannyń basynda Orda.kz redaktsıyasynyń keńselerí men bas redaktor Gúlnar Bajkenovanyń páterínde tíntu júrgízílgen edí. Bajkenovaǵa kóríneu jalǵan aqparat taratty degen aıyp taǵylyp, Almatynyń tergeu soty ony ekí aıǵa úı qamaqqa aldy.
Al QazTAG agenttígíníń basshylyǵy – Áset Mataev pen bas redaktor Ámír Qasenovke qatysty qylmystyq ís Freedom Finance kompanıyasynyń shaǵymy negízínde qozǵalǵan. Freedom Finance jurnalısterdí kompanıyanyń alayaqtyq shemalary turaly jazǵany úshín "kóríneu jalǵan aqparat taratty" dep aıyptap otyr.