Avtomatty qolyna alǵash ret ustap turǵan adam úshin bul óte jaqsy nátıje
«Oımasha» polıgonynda «Batys» óńirlik qolbasshylyǵynyń 25744 áskerı bólimine osy kóktemde merzimdi áskerı qyzmet ótkerýge kelgen 300-den astam jas sarbaz alǵashqy jaýyngerlik atystarǵa qatysty, dep habarlaıdy Almaty-akshamy.kz.
Sarbazdar aldymen atys qarýynyń sıpattamalaryn, oq atý tehnıkasyn jáne qaýipsizdik sharalaryn zerdeledi. Oq-dárilerdi alyp, qarýdy oqtaýdan bastap, atys kezindegi qaýipsizdik sharalaryn saqtaýǵa deıingi barlyq is-qımyl elementteri kezeń-kezeńimen pysyqtaldy.
Daıyndyq sharalarynan keıin jaýyngerler AK-74 avtomatynan oq atýdyń alǵashqy jattyǵýlaryn oryndady. Atys qorytyndysy boıynsha 25744 áskerı bólimi jas sarbazdar rotasynyń komandıri kapıtan Serikjan Tortaev qatardaǵy jaýyngerler Raýan Bazarbaevty, Behrýz Omarovty jáne Kırıll Nesterovty erekshe atap ótti.
– Avtomatty qolyna alǵash ret ustap turǵan adam úshin bul óte jaqsy nátıje. Bizdiń bólimge elimizdiń barlyq óńirinen áskerge shaqyrylýshylar keldi. Olardyń jaýyngerlik daıyndyqqa qyzyǵýshylyǵy men Otanǵa qyzmet etýge degen yntasyn atap ótkim keledi, – dedi rota komandıri.
Qyzmet barysynda komandırler men tájirıbeli tálimgerlerdiń basshylyǵymen jastar áskerı tehnıkamen jáne qarý-jaraqpen jumys isteýdi úırenip, áskerı-eseptik mamandyqqa ıe bolady.
Taıaý kúnderi jaýyngerlik daıarlyqtyń negizderin meńgergen jas jaýyngerler áskerı ant qabyldap, Otan qorǵaýshylar qataryna qosylady.