Bórtege arnalǵan tuńǵysh shyǵarma qazaq sahnasynda da tuńǵysh ret qoıylyp otyr
9-10 qazanda Túrkistan mýzykalyq drama teatry «Bórte» spektaklimen tuńǵysh ret shymyldyǵyn ashady, dep habarlaıdy Almaty-akshamy.kz.
QazAqparattyń habarlaýynsha, bul spektákl belgili dramatýrg, QR Memlekettik syılyǵy laýreaty Dýlat Isabekovtyń pesasy boıynsha qoıylǵan. Bórte - álem tarıhyndaǵy uly qaıratkerlerdiń biri, Shyńǵys hannyń qońyrat taıpasynan alǵan alǵashqy áıeli.
Qoıylym 10-11 jastaǵy Temýchın (Shyńǵys hannyń shyn esimi) men Bórteniń alǵash tanysýynan bastalyp, Shyńǵys qaǵannyń alyp ımperıany basqaryp turǵan kezeńin qamtıdy.
Bul kezeńde Temýchın alaýyzdyq jaılaǵan mońǵol taıpalaryn birtutas memleketke biriktirip, Shyńǵys qaǵan atanady. Shyńǵys han áskeriniń jeńisti joryǵy Qytaıdan bastalyp, Ýkraınada bolǵan ataqty «Kalqa ózeni boıyndaǵy shaıqasqa» deıin jetedi. Spektáklde ójet te qaısar, ajarly da aqyldy, batyr da batyl, bir basynda dramasy men tragedıasy jetip-artylatyn qaısar áıel Bórte hanymnyń ǵumyry baıandalady.
«Bórte» spektaklin qoıýǵa belgili ıtalıalyq rejıser Davıde Lıvermor (Davide Livermore) shaqyryldy. Qoıylymnyń kórkemdik jetekshisi - Aınur Kópbasarova, rejıser - Karlo Shakkalýga (Carlo Sciaccaluga), senograf– Anna Varaldo (Anna Varaldo), koordınator - Elıs Ferrantı (Alice Ferranti), dekorator-sýretshi - Janat Kókimbekov, kostúm boıynsha sýretshi – Aıjan Abdýaıt, kompozıtor - Hamıt Shanǵalıev, ádebı redaktor – Shynar Omarova, jaryq boıynsha sýretshi - Daýren Samashov, baletmeıster – Ásem Aldıbekova, Madına Mýratpekova, Dáýlet Muratpekov, grım boıynsha sýretshi – Adel Nurqasymova jáne Túrkistan mýzykalyq drama teatrynyń jas drama akterlary jáne balet ártisteri.
Tarıhı spektákldiń ǵylymı keńesshisi: tarıhshy, tarıh ǵylymdarynyń kandıdaty, dosent Nurlan Atyǵaev. Rolderde oınaıtyn ártister: Aııa Shárip, Aqbota Qaımaqbaeva, Núrken Óteýilov, Erkebulan Daıyrov, Leılo Beknazar-Hanınga, Ádil Ahmetov, Almahan Kenjebekova, Alıhan Idrysheva, Erjan Nurymbet, Nartaı Saýdanbekuly, Qonysbek Begaıdarov, Zámzágúl Begaıdarov, Altynaı Nógerbek, Azamat Chýkeev, Tolqyn Nurbekova, Áshim Ahmetov, Qýanysh Qonysbekov, Áıgerim Qaıratqyzy.
Dekorasıa shynaılyǵymen, sahnalyq kıimder tartymdylyǵymen, rekvızıtter sheberlerdiń arnaıy daıyndaýymen erekshelenedi. Belgili kompozıtor Hamıt Shańǵalıev spektáklge arnap eksklúzıvti mýzyka jazdy. Teatr dırektory ári kórkemdik jetekshisi Aınur Kópbasarovanyń aıtýynsha, aldaǵy ýaqytta da ozyq tehnıkalyq jáne kreatıv sheshimderge negizdelgen tyń qoıylymdar qala turǵyndary men qonaqtaryna kóptep usynylatyn bolady.
Túrkistan mýzykalyq drama teatry - QR Tuńǵysh Prezıdenti, Elbasy N.Nazarbaevtyń qoldaýymen salynǵan Túrki álemi astanasynyń eń sáýletti ǵımarattarynyń biri. 2021 jyldyń mamyr aıynda Elbasy arnaıy kelip, jańa teatrdyń akterlyq quramymen jáne sahnanyń tehnıkalyq múmkindikterimen tanysqan edi.