Qıraǵan ǵımarattan qazaqstandyq qutqarýshylardyń kúshimen ekinshi qazaqstandyqtyń denesi shyǵaryldy
Túrkıada joǵalǵan qazaqstandyq Mırbolat Qurmashevtiń denesi tabyldy, dep habarlaıdy Almaty-akshamy.kz.
Bul jaıynda Túrkıanyń Hataı qalasynda jer silkinisinen keıin habar-osharsyz ketken qazaqstandyqtardy izdeýge attanǵan bastamashyl top Telegram paraqshasynda málimdedi.
«Biz odan aıyrylyp qaldyq»,- dep jazylǵan habarlamada.
Mırbolat Qurmashevtiń denesin bizdiń qutqarýshylar úıindi astynan alyp shyqqan.
«Túrkıanyń Hataı provınsıasyndaǵy tolyǵymen qıraǵan ǵımarattan qazaqstandyq qutqarýshylardyń kúshimen ekinshi qazaqstandyqtyń denesi shyǵaryldy. Úıindi jaǵdaıyndaǵy qozǵalys kezinde izdestirý barysynda qutqarýshylar aldyn ala belgilengen izdestirý ornyna jetý úshin barynsha jedel túrde arnaıy oıyq jasady. Qutqarýshylar kishkentaı bos oryndar arqyly oıyqtyń ishine kirdi. Bul rette qutqarýshylar qurylymdyq elementter qaıta qulamas úshin tosqaýylda kishkentaı sańylaý jasaýǵa tyrysty, úıindide qaýipti ýchaskelerdi bekitti, úıindi bólshekterin kóterip, jyljytty», - dep habarlady Tótenshe jaǵdaılar mınıstrligi.
Eske sala keteıik, biz buǵan deıin Astana Hub tehnoparkiniń halyqaralyq agenti Mırbolat Qurmashevtiń Túrkıada joǵalyp ketkenin habarlaǵan edik.
Jer silkinisinen keıin Mıraspen baılanys úzilgen.
Aǵasy Almat Qurmashevtyń aıtýynsha, zilzala kezinde ol Túrkıanyń Hataı qalasynda bolǵan.
Keıin Mırýs Qurmashevtiń taǵy úsh áriptesi baılanysqa shyqpaı qaldy. Onyń ekeýi qazaqstandyqtar jáne biri – Túrkıa azamaty.
Onyń ishinde Sabına Mamadárova aman tabyldy, al búgin Ádil Qadirbekovtiń denesi úıindi astynan shyǵaryldy. Úshinshi adam - Túrkıa azamaty da mert bolǵan.