Órttiń jyldam taralýyna aptap ystyq pen jeldi aýa raıy yqpal etken.
Túrkıanyń Antalıa provınsıasyndaǵy orman órtinen 3 adamnyń kóz jumǵany belgili boldy. Jalpy tilsiz jaýdan zardap shekken 122 adamnyń 58-i aýrýhanaǵa jetkizilgen, dep habarlaıdy Almaty-akshamy.kz QazAqparat saıtyna silteme jasap.
AFAD (Túrkıa Respýblıkasy Úkimetiniń janyndaǵy tótenshe jaǵdaılardyń aldyn alý jáne saldaryn joıý basqarmasy) málimeti boıynsha, órt 28 shildede túski kezinde Antalıa provınsıanyń tórt aımaǵynda órt shyqqan. Órttiń jyldam taralýyna aptap ystyq pen jeldi aýa raıy yqpal etken. Órtti aýyzdyqtaýǵa órti sóndirý avıasıasy men qurlyqtaǵy tótenshe jaǵdaımen kúres qyzmetteri jumyldyrylǵan.
Órt saldaryn joıýǵa 1 ushaq, 19 tikushaq, 1 pılotsyz ushý apparaty, 192 órt sóndirý mashınasy, 30 qurylys tehnıkasy, 19 jedel járdem mashınasy, 5 dala asqanasy jáne jeke quramnyń 1000-nan astam adamy tartylǵan.
«Jalynnyń jolynda qalǵan 18 eldi mekenniń turǵyndary qaýipsiz jerge kóshirildi. Manavgat aýdanyndaǵy jaǵdaı baqylaýǵa alyndy, biraq Aqsekide órt basylǵan joq», - dedi Túrkıanyń Aýyl sharýashylyǵy jáne orman sharýashylyǵy mınıstri Bekir Pakdemirli.
«Anadoly» agenttiginiń jazýynsha, órt sóndirýshilerdi ýaqytsha turaqpen qamtamasyz etý úshin 1 300 adam syıatyn 6 jataqhana daıyndalǵan.
Jergilikti polısıa men qutqarý qyzmetteri óńirde órt qaýpi áli seıilmegenin eskertip jatyr.
Qaýipti aýmaqtarǵa kiretin avtokólik joldary jabylyp, qozǵalys shektelgen. Apat aımaǵyn aınalyp ótetin balama joldar ázirlenip jatyr.
Manavgat aýdanynyń gýbernatory Mustafa Igit Oımapynar bógetine túsip ketken 10 azamat qutqarylyp, qaýipsiz jerge jetkizilgenin aıtqan.
Al búgin Túrkıanyń Marmarıs jáne Mılas atty týrısik qalalarynda ormandy-dala alqaptar órtendi. Ony joıý jáne tabıǵı apattan zardap shekkenderdi izdestirý-qutqarý jumystary bastalyp ketti.
Qazir tótenshe jaǵdaı bolǵan aýdanda barlyq saıahattar toqtatyldy. Qazaqstandyq týrıser arasynan kómek suraǵandar joq.