«Bul eki halyqtyń baýyrlastyǵyn kórsetetin is. Biz bunymen maqtanamyz», – dedi Túrkıanyń Almatydaǵy Bas konsýly Alı Ryza Akynjy Shúkir (Shúkrý) Gúnaıdy marapattaý kezinde. Esterińizde bolsa Shúkir Gúnaı esimdi túrik azamaty «Aqkent» shaǵyn aýdanynda bolǵan órtte basyn qaterge tige otyryp úsh bala men anasyn qutqaryp qalǵan edi.
4 tamyz, tústen keıin Túrkıanyń Almatydaǵy Bas konsýldyǵy Shúkir Gúnaıdy marapatta, onyń batyldyǵy baýyrlas halyqtardyń dostyǵyn áıgiledi dep baǵalady. Marapattaýdan buryn Bas konsýl «Aqkent» yqsham aýdanyndaǵy órtten qaza bolǵan jáne zardap shekkenderdiń qaıǵysyna ortaq ekenin jetkizdi.
Bas konsýl Alı Ryza Akynjy sózinde: «Óziniń basyna tóngen qaterge qaramastan adam ómirin saqtap qalý shynynda erlik. Túrik pen qazaq baýyrlastyǵynyń bir kórinisi. Pandemıa kezinde jáne Túrkıadaǵy jer silkinisi apatynda da Qazaqstan men Túrkıadaǵy azamattar bir-birine shynaıy qoldaý kórsetti. Biz tarıhymyzben ǵana emes, shynaıy ómirde de baýyrlas ekenimizdi osyndaı qıynshylyqtarda kórsetken qoldaýlarymyz arqyly dáleldep kelemiz», – dedi.
«Men mundaı marapat pen maqtaý bolady dep kútpedim. Ári, solaı bolsa eken dep istegen joqpyn», – deıdi Shúkir Gúnaı jýrnalısermen kezdeskende. Órt kezindegi áreketin túsindirgende: «Biz órt bolǵan jerge jaqyn mańda qurylys jumystarymen aınalysyp jatqan bolatynbyz. Ondaǵy azamattarmen birge kómekke bardyq. Ózimiz qurylys salasynda bilemiz, qaısy kran qansha bıiktikke jetetinin. Ondaǵy kran joǵary qabatqa jetpeıtin bolǵasyn, ústine saty jalǵap shyqtyq. Qaýipti bolatyny jaıly ol kezde oıǵa eshteńe kelmedi. Arǵy bir úıde balalar bar ekenin estip qarap tura almadym», – deıdi Shúkir.
38 jastaǵy Shúkir Gúndaı 2009 jyldan beri Almatyǵa kelip-ketip jumys istep júrgenin aıtty. Ári tilshilerge qazaq tilinde jaýap berdi. «Instragramda, barlyq jerde aıtyp jatyr ekeni, ertesinde bildim. Biraq, men ol úshin jasamadym, ózimniń de bir qyzym bar», – dedi sóz sońynda.
Oǵan berilgen marapat hatynda: « Qurmetti Shúkrú Gúnaı, 2023 jyldyń 1 tamyzynda Almaty qalasy Aqkent shaǵyn aýdanynda bolǵan órt apaty kezinde basyńyzdy báıgege tigip keıbir qazaq baýyrlarymyzdyń ómirin saqtap qalǵanyńyz úshin jáne túrik-qazaq baýyrlastyǵyna qosqan úlesińiz úshin alǵysymyz ben rızashylyǵymyzdy bildiremiz» delingen.