Ádilet mınıstrligi salynbaǵan jol úshin tólengen 6 mıllıard teńgeni qaıtaryp aldy
Halyqaralyq saýda palatasynyń Arbıtraj soty Qazaqstan Respýblıkasy úkimeti men túrik kompanıasy F&A Road Construction arasyndaǵy daýdy qarastyrdy.
2021 jyly túrik kompanıasy Qazaqstannyń Kólik mınıstrliginiń Avtomobıl joldary komıtetimen «Qúrti - Býrylbaıtal» avtojolyn jasaý týraly kelisimshartqa qol qoıǵan bolatyn. Memlekettik organ merdigerge 5,9 mıllıard teńge kóleminde avans tóledi, biraq belgisiz sebeptermen merdiger jumysty bastamady.
Avtomobıl joldary komıteti tólengen qarjyny óz betinshe qaıtarýǵa tyrysqanymen, kelissózder nátıjesiz aıaqtaldy. Osydan keıin, úkimettiń tapsyrmasy boıynsha, Ádilet mınıstrligi merdigerge qarsy arbıtrajdyq is qozǵady.
White & Case LLP zańgerlik fırmasy bul isti 280 myń dollarǵa alyp, Qazaqstan úkimetiniń atynan arbıtrajǵa júgindi. Arbıtrajdyq is qaraýǵa ketetin jarna 85 myń dollardy qurady.
Túrik seriktesteri óz múmkindikterin shynaıy baǵalap, daýdy beıbit jolmen sheshýdi usyndy. Nátıjesinde, merdiger avansty qaıtarýǵa, zańgerlerdiń qyzmet aqysyn tóleýge jáne arbıtrajdyq shyǵyndardy óteýge mindetteme aldy.
Aıta ketý kerek, dál qazir osyǵan uqsas úsh is boıynsha kelissózder júrip jatyr. Bul isterde de sheteldik kásiporyndar Qazaqstannan avans alyp, mindettemelerin oryndamaı, qarjyny qaıtarmaǵan.