Túrksib aýdanyndaǵy №20 mektepti keńeıtý jobasy jer telimderin alý máselesine qatysty týyndaǵan saýaldarǵa qaramastan júzege asyrylady, dep habarlaıdy Aqshamnews.kz.
Sebebi mekteptegi oryn tapshylyǵyn sheshý – qalanyń basym baǵyttarynyń biri. Bul týraly Almaty qalasy ákiminiń orynbasary Beıbit Shahanov Óńirlik komýnıkasıalar qyzmetiniń brıfıńinde aıtty.
1953 jyly salynǵan №20 mektep 720 oqýshyǵa eseptelgen. Alaıda qazir munda shamamen 1200 bala bilim alýda. Oqý orny qosymsha kabınetterge muqtaj, eki aýysymmen jumys istep jatyr. Bul oqýshylar úshin de, pedagogtar úshin de qolaısyzdyq týǵyzýda. Sport zalynda bir mezette 3-4 synyp qatar jattyǵý ótkizse, 80 oryndyq asqana oqýshylar sanyn tolyq qamtı almaı otyr.
«Turǵyndardyń usynysyn eskere otyryp, biz jobalyq sheshimdi qaıta qarastyryp jatyrmyz. Qazir 1200 orynǵa arnalǵan jańa 5 qabatty mektep salý jospary ázirlenip jatyr. Onyń ishinde sport jáne oıyn alańy da bolady. Bul jer telimderin alý kólemin aıtarlyqtaı qysqartýǵa múmkindik beredi. Degenmen mynany túsiný mańyzdy: qala damyp keledi, al áleýmettik ınfraqurylymdy keńeıtý qajet ári ýaqyt talaby», — dedi Beıbit Shahanov.