Qutqarýshy bolý – beıbit zamandaǵy eń bedeldi ári jaýapty jumystardyń biri. Elimizde adam ómirin qutqaramyn dep óz ómirin báıgege tigetin bul batyrlardyń erligi men eren eńbegi eskerýsiz emes.
Qutqarýshylar kúnine oraı Aqordada Memleket basshysy birshama qutqarýshylardy arnaıy marapattady. Olardyń qatarynda – Almaty qutqarý qyzmetiniń qutqarýshylary – Serik Jańǵaqov pen Amıran Ahmedov bar. Ekeýi de «Erligi úshin» medalimen nagradtaldy.
Birinshi sanattaǵy qutqarýshy, úshinshi razrádtaǵy álpınıs Amıran Ahmedovtyń bul mamandyqty tańdaǵanyna 15 jyldan asqan. Ol 2009 jyly volonter retinde tájirıbeden ótip, 2010 jyly resmı jumysqa qabyldanǵan. Sol ýaqyttan beri ol talaı adamnyń ómirin saqtap qalýǵa sebepshi boldy. Qutqarýshy jaraqat alǵan adamdy arqalap júrip, qaýipsiz jerge túsirgen kezderdi de bolǵan.
- Bir kúni Úlken Almaty kóline bara jatqan qyz joldan jańylyp, tasty taý betkeıine shyǵyp ketti. Sonda júrip ol aıaǵyn syndyryp aldy. Oqıǵa ornyna barǵan kezde ony taýdan kólik ne basqa tásilmen jolǵa deıin túsirip alý múmkin bolmady. Sondyqtan áriptesterimizben kezektesip, arqamyzǵa salyp, ony jedel járdem kóligine deıin jetkizdik, – dedi Amıran Ahmedov.
Onyń aıtýynsha, qıyndyqta qalǵan adamdardy qutqaramyn dep júrip, ózderiniń de ómirine asa qaýip tónetin kezder bolady. Qutqarýshy sondaı sátterdiń birin esine aldy:
- 2016 jyly Polshadan kelgen týrıs óz betinshe taýǵa shyǵyp, aýa raıynyń buzylýyna baılanysty qaıtar joldy taba almaı qalǵan. Biz 30 adam bolyp ony izdeýge kiristik. Sóıtip júrgende ózimiz boranǵa qalyp qoıdyq. Tuman, jel, qar men aýa raıynyń tym sýyq bolýyna baılanysty jumysty jalǵastyrý múmkin bolmady. Tikushaqtyń da kele almady. Biz jerdi 2 metrge qazyp, sonyń ishinde otyrdyq. Qar men jel basylǵan soń, izdestirý jumystaryn jalǵastyrdyq, ol 2 kúndeı júrdi. Ókinishke qaraı, shetel azamatyn qutqarý múmkin bolmady. Onyń denesin taýdan túsirip, týystaryna tapsyrdyq. Osy oqıǵa kezinde taýdyń qandaı ekenin túsindim. Onda aýa raıy bir sátte ózgerip ketedi, – dedi qutqarýshy.
Amıran Ahmedov Prezıdent qolynan alǵan marapat bul tek qana jeke jetistigi emes, jalpy qutqarýshylarǵa kórsetilgen qurmet dep túsinetinin atap ótti. Bul pikirdi «Erligi úshin» medalin alǵan Serik Jańǵaqov ta quptaıdy. Osy salada júrgenine 15 jyldan asqan tájirıbeli maman eń joǵary deńgeıde marapat alý – qutqarýshylar ujymy úshin ortaq qýanysh ekenin aıtty: «Áriptesterim úshin qýanyshtymyn. Jumysymyzdy elep-eskerip, joǵary deńgeıde baǵalap jatqanyna alǵys aıtamyz».
Sonymen qatar Almaty qutqarý qyzmetiniń birinshi sanattaǵy qutqarýshysy bir jumys kúni qalaı ótetinin túsindirdi.
- Bizde tańǵy saǵat 8:00-de aýysym bastalady. Bir táýlik jumys istep 3 kún demalamyz. Biraq 1kún demalǵannan keıin daıyn júrýiń kerek. Sebebi tótenshe jaǵdaılarda qosymsha kúsh qajet bolýy múmkin. Al jańa aýysymǵa túsken soń, aldymen medısınalyq tekseristen ótip, qaýipsizdik erejelerimen tanysamyz. Keıin jeke jabdyqtarymyzdy jáne tehnıkany tekseremiz. Biz álpınıs qutqarýshylar taýdaǵy baqylaý-qutqarý pýnkterine baryp, qajet bolǵan jaǵdaıda jyldam áreket etýge daıyn otyramyz, – dedi ol.
Serik Jańǵaqovtyń aıtýynsha, qazir Almaty taýlarynda qutqarý-izdestirý jumystary óte jıi júredi. Sebebi adamdar arnaıy daıyndyqsyz, ózkúshterin shynaıy baǵalamaı taýǵa shyǵady.
- Keıingi kezde jumysymyz arta tústi. Bir táýlikte 3-4 shaqyrtýǵa baratyn kezder bolady. Onyń sebebi, meniń baıqaǵanym boıynsha, adamdar áleýmettik jeliden ádemi beınejazbalardy kórip, taýǵa shyǵý ońaı dep oılaıdy. Sóıtip jeńil kıimmen shyǵyp ketedi. Azyq-túlik, sý, jyly kıim ózimen birge almaıdy. Ekinshiden, marshrýtty durys bilmeıdi. Odan bólek qaıda bara jatqanyn eshkimge aıtpaıdy. Mundaı qatelikter qaıǵyly jaǵdaıǵa ákelýi múmkin. Taýda tez kún qatyp, aýa raıy jyldam ózgeredi. Adamdar ony da eskermeıdi. Sondyqtan biz túngi ýaqytta jıi jumys isteımiz, – dedi qutqarýshy.