Almatyda 2025 jyly 17,1 mlrd teńgege «Halyq qatysatyn búdjet» jobalaryn júzege asyrý jalǵasady
Almatyda jergilikti turǵyndarǵa qalalyq ınfraqurylymdy jańartý boıynsha ıdeıasyn júzege asyrýǵa múmkindik beretin «Halyq qatysatyn búdjet» baǵdarlamasy sátti iske asyrylýda. Úsh jyl ishinde megapolıste 39,1 mlrd teńge somasyna 938 joba júzege asyryldy, dep habarlaıdy aqshamnews.kz
«Halyq qatysatyn búdjet» baǵdarlamasy turǵyndardyń usynysyn eskere otyryp, jaıly qalalyq orta qurýdyń tıimdi quralyna aınaldy. Almaty ákimdigi onyń damýyn qoldaýǵa nıetti. 2025 jylǵy qala búdjetinde «HQB» jobalaryna 17,1 mlrd teńge qarastyrylǵan.
«HQB» baǵdarlamasy aıasynda Alataý aýdanyndaǵy qaraýsyz qalǵan bos jer kórikti skverge aınaldy. Jobanyń avtory Gaýhar Sheralıevanyń bastamasymen jergilikti turǵyndar ákimdikpen tyǵyz jumys istep, aýmaqty kórkeıtti. Jaıaý júrginshiler joldary, arkalar, oryndyqtar, demalys aımaqtary, jaryq shamdary men avtoturaqtar salyndy. Sondaı-aq skverge aǵashtar men butalar otyrǵyzylyp, aýdannyń kelbeti aıtarlyqtaı ózgerdi.
Naýryzbaı aýdanynda turǵyndar aýdan ákimdigimen birlesip «Shuǵyla» turǵyn úı kesheniniń aýmaǵyn túrlendirdi. Munda balalar jáne vorkaýt alańdary, basketbol alańy, amfıteatr, demalys oryndary, oryndyqtar men átkenshekti bar «Arbat» jasaldy. Biregeı sáýlettik stıldegi shaǵyn formalar men jaryqtandyrý tirekteri keńistikti ereksheleı tústi.
Áýezov aýdanynda da birqatar joba júzege asty. Jergilikti turǵyndardyń bastamasymen 2-shaǵyn aýdandaǵy aýla jáne 1-shaǵyn aýdandaǵy qaraýsyz qalǵan aýmaq kóriktendirildi. Qoǵamdyq keńistikterde aǵashtar men butalar otyrǵyzylyp, sýarý, jaryqtandyrý jáne beınebaqylaý júıeleri ornatyldy.
«Ótinishimizge nazar aýdarǵan bılikke kóp rahmet. Birneshe aıdyń ishinde qaraýsyz qalǵan bul ýchaske jaıly skverge aınaldy», – dedi turǵyn Larısa Mırgalıeva.
«Halyq qatysatyn búdjet» jobasy qalalyq ınfraqurylymdy jaqsartyp, Almatynyń barlyq turǵyny úshin jaıly orta qurýǵa septigin tıgizedi.