Bul aımaqqa barýǵa ýaqytsha shekteýler engizildi.
Almaty oblysyndaǵy Túrgen ózeni aýmaǵynda 30 myńnan astam adam turady, dep habarlaıdy Almaty-akshamy.kz
«Túrgen ózeni baseıniniń muzdaq kólderinde sýdyń tógilýi men seldiń oryn alý qaýpin boldyrmas úshin sý deńgeıin tómendetý boıynsha aldyn alý jumystary júrgizilip jatyr. Jaqynda TJ vıse-mınıstri Batyrbek Ábdishevtiń úılestirýimen TJM Qazavıaqutqarýdyń eki tikushaǵymen muzdaq kóldiń mańynda jabdyqtardy tasymaldap túsirý jumystary júzege asyryldy. Jumystardy «Qazseldenqorǵaý» MM basshylyǵy men avarıalyq brıgadasy júrgizdi», dep málimdedi Tótenshe jaǵdaılar mınıstrligi.
Eki kún ishinde olar sıfon tóseý arqyly erigen muzdyq sýyn aıdaý jumystaryn da júrgizdi. Osylaısha búgin uzyndyǵy 300-ge jýyq metr, ónimdiligi sekýndyna 110 lıtr bolatyn alǵashqy sıfon tizbegi iske qosyldy.
«Kólderdegi jumystar aýa raıyna baılanysty jalǵasady, shamamen bıylǵy 16 shildege deıin jalǵasýy múmkin. Aıta keteıik, júrgizilip jatqan jedel jumystar adamdardyń ómirine jáne obektilerdiń qıraýyna qaýip tóndiretin sel tasqynynyń paıda bolý qaýpin boldyrmaýǵa baǵyttalǵan. Daıyndyq jumystary Almaty oblysy ákimdiginiń qoldaýymen uıymdastyryldy. Almaty oblysynyń aýmaǵynda Túrgen ózeniniń baseıninde kúrdeli sel jaǵdaıy baıqalady. Qaýip-qater aımaǵynda 30 myńnan astam adam turatyn Taý-Túrgen, Túrgen, Qarakemer, Baltabaı eldi mekenderi bar. Osyǵan baılanysty muzdyqtyń jáne Túrgen ózeni basseıini kóliniń sel jáne gıdrometeorologıalyq jaǵdaıyna monıtorıń uıymdastyryldy. «Qazseldenqorǵaý» MM beketteri halyqty ýaqtyly habardar etý úshin táýlik boıy jumys isteıdi», - deıdi TJM.
Bul aımaqqa barýǵa ýaqytsha shekteýler engizildi. Jaıaý týrıserdi, avtokólik ıelerin, jergilikti turǵyndar men atqarýshy organdardy qulaqtandyrý jumystary júrgizilip jatyr. Tótenshe jaǵdaıdyń aldyn alý úshin barlyq múmkin shara qabyldanyp jatyr. Sondyqtan tek resmı aqparat kózderine senińizder, dep eskertti qutqarýshylar.