Ata zańnyń búkil bólimine ózgeris engiziledi.
Konstıtýsıalyq keńestiń apparat jetekshisi Baqyt Nurmuhanov Tuńǵysh Prezıdenttiń Ata zańdaǵy mártebesi týraly aıtyp berdi, dep habarlaıdy Almaty-akshamt.kz QazAqparatqa silteme jasap.
«Konstıtýsıada 46-bap bolmaıdy. Al 91-bapta Tuńǵysh Prezıdenttiń mártebesine qatysty «Táýelsiz Qazaqstannyń negizin qalaýshy» degen sóz ǵana qalady. Basqa eshqandaı sóz joq», - dedi ol Ortalyq komýnıkasıalar qyzmetindegi baspasóz máslıhaty barysynda BAQ ókilderiniń saýalyna oraı.
Sonymen qatar ol qazirgi Konstıtýsıada "Tuńǵysh Prezıdent Konstıtýsıalyq keńestiń múshesi bola alady" degen bap bar ekendigin atap ótti.
«Biraq, Konstıtýsıalyq sot saıası organ sanalady. Endi Konstıtýsıalyq sot bolǵan kezde ol jerde naǵyz mamandar, zańgerler otyrýy kerek. Sol úshin burynǵy Prezıdentter múshe, sýdıa, sot bola almaıdy. Iaǵnı, ókilettigi joq», - dedi Baqyt Nurmuhanov.
Onyń túsindirýinshe, qazirgi ýaqytta Ata zańnyń 33-babyna 56 túzetý engizý kózdelgen.
«Eki bólimniń ataýy ózgeredi. Sonymen alǵanda, Ata zańnyń búkil bólimine ózgeris engiziledi. Konstıtýsıalyq keńeske arnalǵan bólim Konstıtýsıalyq sot bolyp, sot jáne sot tóreligi degen 7-bólimniń ataýyna prokýratýra jáne adam quqyqtary jónindegi ýákil degen sózder qosylady. Óıtkeni, bul bólimde atalǵan ınstıtýttarǵa arnalǵan baptar bar», - dedi ol.
Eske sala keteıik, buǵan deıin Konstıtýsıalyq keńes Prezıdent Qasym-Jomart Toqaevtyń ótinishin is júrgizýge qabyldaǵan bolatyn.