QR Premer-Mınıstri Álıhan Smaıylovtyń tóraǵalyǵymen ótken Úkimet otyrysynda temirjol salasyn odan ári damytý sharalary qaraldy.
Premer-Mınıstr temirjol – kólik salasynyń jáne jalpy el ekonomıkasynyń kúretamyry ekenin atap ótti, dep habarlaıdy almaty-akshamy.kz.
«Elimiz kóptegen halyqaralyq baǵyttar toǵysatyn, toǵyz joldyń torabynda ornalasqan. Azıa men Eýropa arasynda Qazaqstan arqyly ótetin tranzıttik tasymal kólemi jyl saıyn óse túsýde. Tek qana Qazaqstan men Qytaı arasyndaǵy temirjolmen júk tasymaldaý ótken jyly 23 mln tonnadan asty. Bıyl bul kórsetkish taǵy 22%-ke ósti»,- dedi Álıhan Smaıylov.
Úkimet basshysy atap ótkendeı, búgingi tańda jyljymaly quram men magıstraldyq jelilerdiń tozý deńgeıi shamamen 60%-ǵa jetip otyr.
«Shekarada júkterdiń rásimdelýine qatysty problemalar bar, bul tranzıt, eksport jáne ımport kólemine áser etedi. Sondyqtan, bıznes úshin qujattardy barynsha jyldam qarap, daıyndap beretin “bir tereze” júıesin qurý qajet. Barlyq qyzmetter jedel ári bir mezette, ıaǵnı sınhrondy túrde jumys isteýi tıis», - dedi Álıhan Smaıylov.
Onyń aıtýynsha, turǵyndar tarapynan QTJ qyzmetine qatysty kóptegen shaǵymdar kelip túsýde.
«Bul – poıyzdardyń únemi keshigip kelýi, servıstiń nasharlyǵy, eskirgen vagondarǵa qatysty. Al, bıznes bolsa vagondardyń ýaqytynda berilmeýin, uzynnan-uzaq kelisý rásimderin aıtyp, shaǵymdanýda. Osynyń barlyǵy búkil ekonomıkanyń damýyna keri yqpal etedi», - dep atap ótti Premer-Mınıstr.
Joǵaryda aıtylǵandardy qorytyndylaı kele, Premer-Mınıstr Kólik, Qarjy, Aýyl sharýashylyǵy mınıstrlikterine, Shekara qyzmeti, «Qazaqstan temir joly» jáne «Samuryq-Qazyna» qoryna jyl sońyna deıin júkterdi rásimdeýdi ońaılatý máselesin pysyqtaýdy tapsyrdy.
«Qaraý merzimi kem degende 2 ese qysqarýy tıis», - dedi Úkimet basshysy.