Qatysýshylar júzý, ústel tenısi, darts, boýlıń jáne voleıboldan erler komandasy sıaqty sport túrlerinen jarysty
Oksford qalasynda (Ulybrıtanıa) ótken aǵzalardy transplanttaýdan keıingi jáne dıalızde júrgen adamdar arasyndaǵy Eýropa chempıonatynda Qazaqstannyń qurama komandasy 26 medaldan 12 medalǵa ıe bolyp, jalpykomandalyq esepte 18-shi orynǵa ıe boldy. Bizdiń quramanyń qorjynynda 1 altyn, 6 kúmis jáne 5 qola medal bar, dep habarlaıdy Almaty-akshamy.kz.
Densaýlyq saqtaý mınıstrliginiń málimetinshe, Chempıonatqa Eýropalyq sport federasıasyna múshe 26 elden barlyǵy 400-den astam sportshy qatysty. 2018 jyldan bastap osy federasıada Qazaqstannyń atynan "Ómir tynysy" transplantasıalanǵan naýqastardyń qoǵamdyq birlestigi ókildik etýde.
2022 jylǵy Eýropa chempıonatynda Qazaqstan qurama komandasy 16 sportshydan, 2019 jylǵy respýblıkalyq jarystardyń júldegerlerinen, júrek jáne búırek transplantasıasynan ótken, sondaı-aq dıalızdegi sportshylardan turdy.
Qatysýshylar júzý, ústel tenısi, darts, boýlıń jáne voleıboldan erler komandasy sıaqty sport túrlerinen jarysty.
Osylaısha, Laýra Tabajanova 29-40 jas aralyǵyndaǵy áıelder arasyndaǵy ústel tenısinen jeńiske jetti. 19-30 jas aralyǵyndaǵy erler arasynda bul sanatta Elaman Dáýlethan ekinshi oryndy ıelendi.
50 metrge júzýde kúmis jáne qola medaldi Jetpispaev Marat pen Gúlmıra Nuǵmanova ákeldi.
«Erjan Muhamadıev pen Ospanov Jánibek juptyq boýlıńte eki kúmis medal jeńip aldy. 40-49 jáne 30-39 jas aralyǵyndaǵy dartstan ótken jarysta Erjan Muhamadıev, Aıat Aıtmanov jáne Muhamet Opabekov kúmis medaldi ıelendi. Eýropalyq chempıonatty ótkizýdiń basty maqsaty aǵzalar donorlyǵyn damytýǵa nazar aýdarý jáne transplantasıadan keıin pasıentterdiń múmkindikterin kórsetý bolyp tabylady», - delingen habarlamada.
Óz kezeginde, Qazaqstan komandasynyń transplantasıadan ótken adamdar men dıalızdegi pasıentter arasyndaǵy halyqaralyq jarystarǵa qatysýy qazaqstandyq medısına damýynyń joǵary deńgeıin kórsetedi, onda búgingi kúni organdardy aýystyrý boıynsha operasıalardy júrgizý úshin barlyq ınfraqurylymdyq jáne tehnologıalyq baza qurylǵan.
Transplantasıa adamdardy tolyqqandy ómirine qaıtaryp, ómir súrý sapasyn arttyrady, olardyń fızıkalyq jaǵdaıy sportpen shuǵyldanýǵa jáne tipti halyqaralyq sport alańdarynda eldiń namysyn qorǵaýǵa múmkindik beredi.
Jánibek Ospanovtyń jetekshiligimen "Ómir tynysy" qoǵamdyq uıymy Qazaqstanda transplantasıadan keıin adamdardyń ómir súrý sapasy men uzaqtyǵyn jaqsartýǵa jáne ólimnen keıingi donorlyqty jáne aǵzalardy almastyrýdy damytýǵa járdemdesýdi maqsat etip qoıdy.