Tramptyń ınaýgýrasıasyna Sı Szınpın men ózge de álem kóshbasshylary shaqyryldy
AQSH-tyń jańadan saılanǵan prezıdenti Donald Tramp kelesi aıda ótetin ınaýgýrasıasyna Qytaı basshysy Sı Szınpındi shaqyrdy. CBS News-tiń derekterine súıensek, ınaýgýrasıany uıymdastyrý toby ózge sheteldik qurmetti qonaqtardy da saltanatty rásimge shaqyrý josparlaryn ázirleýde, dep habarlaıdy aqshamnews.kz
Shaqyrtý qarasha aıynyń basynda, Tramp saılaýda jeńiske jetkennen keıin birden jiberilgen. Alaıda Sı Szınpın bul shaqyrýdy qabyldaǵan-qabyldamaǵany ázirge belgisiz. Vashıngtondaǵy Qytaı elshiliginiń ókilderi bul týraly pikir bildirgen joq.
Tramp komandasy 20 qańtarda Kapıtolııde ótetin ınaýgýrasıaǵa basqa da sheteldik kóshbasshylardy shaqyrý máselesin qarastyrýda. Mysaly, Vengrıa premer-mınıstri, ońshyl kózqarastaǵy Vıktor Orban Tramppen jyly qarym-qatynasta jáne jýyrda onyń Mar-a-Lago rezıdensıasynda qonaq boldy. Orbannyń ınaýgýrasıaǵa qatysý-qatyspaýy ázirge belgisiz.
"Álem kóshbasshylary Tramppen kezdesýge kezekke tur. Olar onyń jaqynda bılikke qaıta oralyp, Amerıka qýaty arqyly álemge beıbitshilik ornatatynyn jaqsy biledi", – dep málimdedi Tramptyń aýysý kezeńindegi ókili Karolın Levıtt.
Jalpy, AQSH ınaýgýrasıalary kezinde elshiler men dıplomattar shaqyrylady, biraq Memlekettik departamenttiń 1874 jyldan bergi derekterinde ınaýgýrasıada birde-bir sheteldik kóshbasshynyń qatyspaǵany kórsetilgen.
Tramptyń jaqtastary Qytaı úkimetin jıi synǵa alady. Onyń ishinde, memlekettik hatshy qyzmetine usynylǵan senator Marko Rýbıo men ulttyq qaýipsizdik jónindegi keńesshi qyzmetine taǵaıyndalǵan Maık Ýolts bar. Sonymen qatar, Tramptyń ózi Qytaıdan keletin taýarlarǵa tarıfterdi arttyrýdy birneshe ret usynǵan. Buǵan qosa, TikTok áleýmettik jelisiniń qytaılyq ByteDance kompanıasyna 19 qańtarǵa deıin satylym jasamasa, AQSH-taǵy qyzmetin toqtatý talaby qoıylǵan. TikTok bul sheshimge qarsy Joǵarǵy Sotqa shaǵymdanýda.
Tramp árdaıym kóshbasshylar arasyndaǵy jeke qarym-qatynastardy halyqaralyq kelissózderde mańyzdy dep sanaıdy. Saılaýdan keıin álem kóshbasshylary onyń Mar-a-Lago rezıdensıasyna jıi baryp júr. Máselen, Kanada premer-mınıstri Djastın Trúdo jáne Argentına prezıdenti Haver Mıleı Tramppen jeke kezdesýler ótkizdi.
Fransıa prezıdenti Emmanýel Makron saılaýdan keıin Trampty alǵash ret resmı túrde Parıjde qabyldady. Bul kezdesý Notr-Dam soborynyń ashylýyna oraı uıymdastyryldy. Sol jerde Italıa premer-mınıstri Djordjıa Melonı, Ýkraına prezıdenti Vladımır Zelenskıı jáne Ýels hanzadasy Ýılám da boldy.
Eger 2017 jylǵy ınaýgýrasıa kezinde Tramp álemdik arenada beımálim tulǵa bolsa, bul joly álem kóshbasshylary ony qyzmetin qaıta atqaryp jatqan prezıdent retinde qabyldaýda.