Almaty jáne Máskeý mıkrohırýrgtary qatty kúıikten zardap shekken balalarǵa kúrdeli ota jasady
Almatyda №2 qalalyq balalar klınıkalyq aýrýhanasynyń bazasynda sırek kezdesetin aıaq-qol sırek patologıasy, aýyr kúıigi men tyrtyǵy bar balalarǵa ota jasaldy. Árbir ota erekshe. Óıtkeni barlyq klınıkalyq jaǵdaıdyń ózi sırek kezdesedi, dep esepteıdi qazaqstandyq dárigerler. Ota kezinde barlyq klınıkada kezdespeıtin tyń tehnologıa qoldanylady.
«Sheberlik dárisi aıasynda birlesken otalardy qazaqstandyq dárigerler men aıaq-qol mıkrohırýrgıasy boıynsha álemdik deńgeıdegi maman, Máskeý qalasyndaǵy Reseı halyqtar dostyǵy ýnıversıtetiniń Travmatologıa jáne ortopedıa kafedrasynyń profesory Igor Golýbev jasady. Onyń elimizge «Meıirimdilik» erikti qoǵamy» qoǵamdyq qory uıymdastyrdy. Biz birge týa bitken jáne júre paıda bolǵan aıaq-qolynda aqaýy bar tórt balaǵa ota jasadyq. Bul negizinen balalardyń sapaly ómir súrýine kedergi keltiretin kúıikter men tyrtyqtar bolatyn», – deıdi Almaty qalasynyń №2 QBKA dırektory Marat Rabandıarov.
«Tórt jasar Serik Múslim termıalyq kúıiktiń aýyr zardabyn tartqan. Oǵan birneshe jyl buryn ota jasalǵan bolatyn. Endi qanmen qamtamasyz etilgen tindi aıaqtaǵy kúretamyrǵa transplantasıalaý qajet boldy. Nátıjesi jaqsy: bilektegi kemistik joıylyp, qol emin-erkin qozǵalýy úshin kóp jaraqattanbaǵan bas barmaqpen jumys istedik», – deıdi №2 QBKA travmatolog-dárigeri Uljan Soltanbekova.
Taǵy bir kishkentaı naýqas Aıǵanym Nurbekqyzyna «Termıalyq kúıiktiń saldary» degen dıagnoz qoıylǵan. Anasy bir jasynda Aıǵanymnyń aıaq-qoly qaınaǵan sýǵa kúıgenin, keıin jaralar tolyq jazylmaı, aıaq baqaıynyń búgilýine kedergi keltiretin tyrtyqtyń paıda bolǵanyn aıtady. Otadan soń qyzdyń oń tizesiniń býyny búgiletin boldy, naýqastyń anasy dárigerlerge alǵys aıtyp, Aıǵanymnyń baqaıynyń qozǵalǵanyn búkil otbasy bolyp kútkenin aıtady. Qazir Aıǵanym qozǵala alady, otadan keıingi qalpyna kelý em-sharasyn qabyldap jatyr.
Sheberlik dárisin ótkizgen Igor Golýbevtiń bul Almatyǵa alǵashqy sapary emes. Ol kúrdeli dıagnozy bar balalardy qazaqstandyq mıkrohırýrg áriptesterimen birge emdeıdi. Máskeý qalasyndaǵy Reseı halyqtar dostyǵy ýnıversıtetiniń Travmatologıa jáne ortopedıa kafedrasynyń profesory bylaı deıdi:
«Bul joly emdelýi óte qıyn jáne basqa músheden tinderdi engizýdi qajetsinetin kúıiktiń saldarymen joıýmen aınalystyq. Atap aıtqanda, keshe biz ystyq peshti qolymen ustap alyp, barlyq saýsaǵy byrysyp kúıip qalǵan balaǵa ota jasadyq. Biz barlyq klınıkada kezdespeıtin eksklúzıvti tehnologıa qoldanamyz. Balalarmen jáne sezimtal tindermen jumys jasaýda ár mıllımetr mańyzdy ról atqarady, bizdegi barlyq klınıkalyq jaǵdaıdyń sırek kezdesetinin eskersek, árbir ota ózinshe erekshe», dep sózin túıindedi mıkrohırýrgıa jáne qol jaraqaty bóliminiń meńgerýshisi, medısına ǵylymdarynyń doktory, Máskeý qalasyndaǵy Reseı halyqtar dostyǵy ýnıversıtetiniń Travmatologıa jáne ortopedıa kafedrasynyń profesory Igor Golýbev.
Qazirgi ýaqytta ota jasalǵan barlyq bala ózin jaqsy sezinedi. Dárigerler 7-10 kún boıy stasıonar jaǵdaıynda baqylap, keıin olardy birtindep aýrýhanadan shyǵaratynyn aıtady.