Bostandyq aýdanynyń turǵyndarynyń usynǵan bul joba – jaıaý júrginshilerge basymdyq berip, jaıly da qaýipsiz orta qurýdy kózdeıtin qazirgi ýrbanıstıkanyń talaptaryn negizge alyp jasalmaq, dep habarlaıdy aqshamnews.kz
Aýdan ákimdigi men Óńirlik komýnıkasıalar qyzmeti uıymdastyrǵan baspasóz týry barysynda aýdan ákimi Sanjar Álın bul aýmaq abattanǵan aımaq qana emes, barlyq jastaǵylarǵa arnalǵan qolaıly ári qaýipsiz qoǵamdyq keńistik bolaryn atap ótti.
Abattandyrý ıdeıasynyń avtory - aýdan turǵyny Aıman Bekbergenova. Ol 2024 jyly osy aýmaqty «Halyq qatysatyn búdjet» baǵdarlamasyna qosýdy usynǵan. Buǵan deıin bul jerdiń ınfraqurylymy ábden eskirip, zaman talabyna saı kelmeıtin. Jaıaý júrginshiler men velosıped joldary qıylysyp jatty, trotýarlary tar, qolaısyz boldy, aıaldamada da adam aınalyp júre almaıtyn. Munyń bári qolaısyzdyq týdyryp, serýendeýge, demalyp, qaýipsiz qatynaýǵa kedergi keltirdi. Kórshilerdiń qoldaýynyń arqasynda joba qarjylandyrylyp, aqyry osyndaı joba dúnıege kelipti.
«Adamdar velojolmen júretin, trotýar tar, aıaldamada eshqandaı jaǵdaı jasalmaǵan. Biz muny ózgertý kerek dedik. Kórshilermen birigip, ótinish berdik sosyn. Endi kósheniń qalaı ózgerip jatqanyn kórip otyrmyz», – deıdi jobanyń bastamashysy Aıman Bekbergenova.
Jaıaý júrginshiler aımaǵy «adamdarǵa arnalǵan qalalyq kóshe» qaǵıdattaryna saı jasalyp, trotýardy keń etip, velojolaq salyp, demalys oryndary men kógaldandyrý da kózdelgen. Aýmaq tolyq tazartylyp, eski qurylymdar buzyldy, ınjenerlik jumystar júrgizilip, jańa jabyn tóselip jatyr. Sheshim qabyldaýǵa turǵyndardyń ózi qatysyp, olardyń ótinishi túgel eskerildi.
«Biz bul jerde kóp jyldan beri turamyz. Toraıǵyrov kóshesi yńǵaıly ári ádemi bolǵanyn armandap keldik. Endi munda oryndyq, kóleńkeli shatyr qoıyp, kógaldandyryp, átkenshek, jaryq qoıyp, kamera da ornatty. Bul endi jaı trotýar emes, ýaqyt ótkizip, demalatyn jer de bolady», – deıdi Aıman Bekbergenova.
Jobada myna elementter qolǵa alynǵan:
• taktıldi plıtkalarmen jabdyqtalǵan keń trotýarlar,
• aǵash pergolalary bar demalys aımaqtary,
• balalardyń oıyn alańy,
• jastarǵa arnalǵan vorkaýt alańy,
• avtomatty sýarý júıesi,
• 1500-den astam buta men 500-ge jýyq aǵash egý,
• «qaýipsiz kóshe» tujyrymdamasy aıasynda jaryqtandyryp, kamera ornatý.
Velojolaqtar salý da josparlanǵanymen, jaıaý júrginshilerge basymdyq beriledi.
«Jaıaý júrginshiler aımaǵy 4,2 gektardan astam aýmaqty qamtıdy. Buryn bul aýmaq qala turǵyndaryna jaısyzdaý bolatyn: demalýǵa arnalǵan oryndyqtary, balalar alańy bolǵan joq, trotýarlary tar ári yńǵaısyz, kógal da joqtyń qasy edi», - dep qosty aýdan ákimi.
Negizgi jumystardy 2025 jyldyń qazan aıynyń sońyna deıin aıaqtaý josparlanǵan. Bul jaıaý júrginshiler aımaǵy jaıly baǵyt qana emes, turǵyndardy tartyp turatyn jer bolyp, qalalyq ortany turǵyndar óz kúshimen qalaı ózgerete alatynyna jarqyn mysal bolyp qalmaq.