Prezıdenttikke kandıdat Qasym-Jomart Toqaevtyń Respýblıkalyq qoǵamdyq shtabynyń músheleri Atyraý oblysynyń turǵyndarymen birqatar kezdesý ótkizdi, dep habarlaıdy Almaty-akshamy.kz.
RQSH músheleri «Bolashaq» munaı men gazdy keshendi daıyndaý zaýytynyń ujymymen kezdesip, kandıdattyń saılaýaldy baǵdarlamasynda kórsetilgen eldiń energetıkalyq sektoryn damytý jónindegi sharalarǵa nazar aýdardy.
«Búgin shtab músheleri munaı-gaz, balyq sharýashylyǵy salalary kásiporyndarynyń eńbek ujymdarymen, Atyraý oblysynyń jurtshylyǵymen jáne jastarmen kezdesedi. Bizdiń mindetimiz – árbir qazaqstandyqqa aldaǵy saılaýdyń mańyzdylyǵyn jetkizý. Barshany 20 qarashada saılaý ýchaskelerine kelip, azamattyq boryshyn óteýge shaqyramyz. Bul – elimizdiń erteńi úshin óte mańyzdy tańdaý», - dedi Respýblıkalyq qoǵamdyq shtab múshesi Baqtyqoja İzmuhambetov.
Munaı-gaz salasynyń ardagerlerimen kezdesýde Qasym-Jomart Toqaevtyń jaqtastary saılaýaldy baǵdarlamanyń kásiporyndardaǵy eńbek jaǵdaılaryn jaqsartý jáne jalaqyny arttyrýǵa qatysty tarmaqtaryna toqtaldy.
Budan soń balyq óńdeý kásipornynyń alańynda sala kásipkerlerimen birlesip, saılaýaldy baǵdarlamada kórsetilgen balyq sharýashylyǵyn damytý jáne sý nysandarynyń ekojúıesin qorǵaý jónindegi sharalar talqylandy.
Osy kúni oblys jurtshylyǵymen kezdesý ótti, onyń barysynda RQSH músheleri saılaýaldy baǵdarlamanyń óńirlerdegi áleýmettik jáne komýnaldyq ınfraqurylymdy damytýǵa arnalǵan bólimine egjeı-tegjeıli toqtaldy.