Kezdesýde memleket basshysy búgin prezıdent Vo Vang Thyongpen nátıjeli kelissóz júrgizgenin jáne onyń barysynda ekijaqty yntymaqtastyqtyń negizgi baǵyttary talqylanǵanyn atap ótti.
Prezıdent Qasym-Jomart Toqaev Vetnam premer-mınıstri Fam Mın Chınmen kezdesti, dep habarlaıdy Almaty-akshamy.kz Aqordaǵa silteme jasap.
Qasym-Jomart Toqaevtyń aıtýynsha, elimiz Vetnamdy Ońtústik Shyǵys Azıadaǵy eń basty seriktesteriniń biri retinde qarastyrady. Prezıdent Hanoıǵa jasaǵan saparynyń nátıjesin joǵary baǵalady.
"Búgin tańerteń prezıdent Vo Van Thyongpen óte nátıjeli kelissóz júrgizdim. Biz kóptegen saladaǵy qarym-qatynastarymyz ben yntymaqtastyǵymyzdy nyǵaıtýǵa yqpal etetin óte mańyzdy ýaǵdalastyqtarǵa qol jetkizdik. Jan-jaqty yntymaqtastyǵymyzdyń negizgi baǵyttary aıqyndalǵan Birlesken komúnıke qabyldadyq. Sondaı-aq Vetnam kásipkerlerimen kezdesý ótkizdim. Olardyń Qazaqstan naryǵyndaǵy qyzmetin qoldaýǵa daıynmyn. Biz elimizde vetnamdyq bıznestiń uzaq ýaqyt jumys isteýine shyn máninde múddeli bolǵandyqtan kómek kórsetemiz. Vetnam – ekonomıkalyq ósim turǵysynan qarqyndy damyp kele jatqan el", – dedi Qasym-Jomart Toqaev.
Memleket basshysy búgin qol qoıylǵan Saýda-ekonomıkalyq yntymaqtastyqty jedel damytý jónindegi úkimetaralyq birlesken is-qımyldar jospary saýda, ınvestısıa, tehnologıa, aýyl sharýashylyǵy, tranzıt jáne týrızm sıaqty mańyzdy salalar boıynsha eki eldiń ózara baılanystaryn jandandyrýǵa yqpal etetin negizgi qujat bolatynyna senim bildirdi.
Óz kezeginde Vetnam premer-mınıstri Fam Mın Chın Qasym-Jomart Toqaevtyń sapary Qazaqstan men Vetnamnyń ekijaqty yntymaqtastyǵyna tyń serpin beretinin atap ótti.
"Eki tarap qol qoıǵan qujattar men kelisimder keleshekte yntymaqtastyǵymyzǵa berik negiz bolady. Sizben Qazaqstan men Vetnamnyń saıasat, dıplomatıa, ınvestısıa jáne saýda salalaryndaǵy qarym-qatynasyn odan ári damytyp, tereńdetý joldaryn talqylaýǵa múddelimiz", - dedi Fam Mın Chın.