Qazaqstan Prezıdenti Álemdik jáne dástúrli dinder kóshbasshylarynyń VIII seziniń ashylýynda sóz sóıledi, - dep habarlaıdy Aqshamnews.kz tilshisi.
Qasym-Jomart Toqaev Astana tórinde bas qosqan álemniń eń bedeldi rýhanı kóshbasshylary men basqa da qatysýshylarǵa iltıpat bildirip, Sıez jumysyna qoldaý kórsetkenderi úshin alǵys aıtty.
"Kıplıngshe aıtsaq, "Batystyń aty – Batys, Shyǵystyń aty – Shyǵys. Olar eshqashan bir arnada toǵyspaıdy". Birqatar iri memlekette bolǵan keıingi ýaqıǵalardy sholyp ótsek, mundaı uıǵarymnyń durys kórinýi múmkin. Biraq saıası faktordy eshqashan esten shyǵarýǵa bolmaıdy. Basqasha aıtqanda, basqarýshy bıliktiń memlekettik qurylym týraly tujyrymy men tájirıbesin qaperde ustaǵan jón. Olar júrgizetin saıasattyń beıbit dıalogty qoldaý, mádenıetterdiń, túrli din men dúnıetanymnyń yqpaldastyǵy turǵysynan árdaıym oryndy ári konstrýktıvti bola bermeıtinin kórip otyrmyz. Ásireultshyldyq pen jalǵan patrıotızmniń kún sanap beleń alýy alańdatpaı qoımaıdy. Qalyptasqan túsinikterdiń kóz aldymyzda ózgerýi jastardy adastyrady. Bir jaǵynan biz quqyqtyq konservatıvti jáne lıberaldy ıdeologıalardyń qaqtyǵysyna kýámiz. Bul birqatar eldi saıası turaqsyzdyqqa ákeledi. Qazaqstanda osy tektes jahandyq problemalarǵa jiti nazar aýdarylady. Bul – ishki saıasatymyzdyń negizgi ózegi. Túrli etnos, din jáne ult ókilderi arasynda toleranttylyq pen ózara qurmet saıasatyn júrgizý mańyzdy dep sanaımyn. "Birligimiz áralýandyqta" ustanymyna zıan keltirip, oǵan kúıe jaqqysy keletin, sonyń ishinde memlekettik qyzmette jáne qoǵamdyq orynda elimizdi turaqty meken etetin halyqtardyń tilin erkin qoldanýǵa qarsy áreketterge qatań tosqaýyl qoıylady. Oǵan "Zań jáne tártip" qaǵıdatyna saı quqyqtyq baǵa beriledi", – dedi Qasym-Jomart Toqaev.
Prezıdent Qazaqstanda sońǵy jyldary anaǵurlym ornyqty, ashyq ári ádil saıası júıe qalyptastyrýǵa baǵyttalǵan aýqymdy ózgerister dáıekti túrde júrgizilgenin atap ótti.
"Adam quqyǵyn qorǵaý salasy aıtarlyqtaı kúsheıdi: Konstıtýsıalyq sot qurylyp, ombýdsmen ınstıtýty nyǵaıdy, arnaıy zańdar men jarlyqtar shyǵaryldy. Jalpyulttyq referendým kezinde azamattarymyzdyń basym bóligi qoldaǵan 2022 jylǵy konstıtýsıalyq reforma saıası júıemizdi túbegeıli jańǵyrtty. Biz "Kúshti Prezıdent – yqpaldy Parlament – esep beretin Úkimet" qaǵıdatyn basshylyqqa aldyq. Prezıdentti jeti jylǵa bir ret saılaý tártibi bekitilip, sondaı-aq, Memleket basshysynyń jaqyn týystaryna saıası laýazym atqarýǵa tyıym salatyn normalar engizildi. Budan bólek jaqynda Qazaqstan halqyna arnaǵan joldaýymda elimizde bir palataly Parlament qurý bastamasyn kóterdim. Bul usynys halyq múddesine saı saıası júıeni jańǵyrtý nıetinen týyndap otyr. "Zań jáne tártip" tujyrymdamasy negizinde qoǵamnyń turaqtylyǵy men azamattardyń qaýipsizdigin qamtamasyz etýge ishki saıasatymyzda erekshe mán beriledi", – dedi Prezıdent.