Almaty ákimdigi Áýezov aýdanyndaǵy Iassaýı kóshesinde bolǵan jaǵdaıǵa qatysty pikir bildirdi, - dep habarlaıdy Aqshamnews.kz tilshisi.
17 qyrkúıekte tańerteń Iassaýı men Dastan kósheleriniń qıylysynda jol jabynynyń shamamen 100 sharshy metr aýmaqtaǵy bóligi opyryldy. Buǵan deıin "Speskommýnstroı" merdiger uıymy uzyndyǵy 2,8 shaqyrym bolatyn káriz jelilerin salý jumystaryn atqarǵan bolatyn.
"Júrgizilgen tekserý barysynda nóser jaýyn kezinde abonenttik jeliler transheıalarynyń shaıylýy jáne topyraq negiziniń jumsarýy anyqtaldy. Sonyń saldarynan jol jabyndysynda oıyq paıda bolyp, asfált buzylǵan. Qazir jol tósemin qalpyna keltirý jumystary júrgizilip jatyr", - delingen habarlamada.
Jóndeý jumystaryn aıaqtaý merzimi – 18 qyrkúıek.
Bul jobanyń tehnıkalyq qadaǵalaý qyzmeti jumystardyń Qurylys normalary men erejeleri jobalyq talaptarǵa sáıkes oryndalǵanyn habarlady.
"Qazir sebepterdi anyqtaý maqsatynda qosymsha tekserý júrgizilip jatyr. Iassaýı kóshesindegi asfált jabynynyń oıylý sebepterin naqtylaý úshin Qalalyq qurylys baqylaý basqarmasyna suraýhat joldandy. Sebebi topyraqtyń durys nyǵyzdalmaýy yqtımal nusqa retinde qarastyrylyp otyr. Onyń naqty sebebi tekserý nátıjesinde belgili bolady", - dedi Almaty ákiminiń komýnıkasıa jáne BAQ-pen jumys boıynsha keńesshisi Ilzat Akchýrın.