Seýl tórinde qazaq halqynyń uly perzenti, aqyn Abaı Qunanbaıulynyń bústi ornatyldy
– Seýl tórinde qazaq halqynyń uly perzenti, aqyn Abaı Qunanbaıulynyń bústi ornatyldy. Bul – koreı baýyrlarymyzdyń qazaq halqyna degen zor qurmetiniń belgisi, – dedi Qazaqstan Prezıdenti.
Bústtiń jobasy Qazaqstanda daıyndalyp, tutas músini Koreıada qoladan quıylǵan. Qasym-Jomart Toqaev bústtiń Koreıa astanasyndaǵy ýnıversıtet aýmaǵyna ornatylýynyń mańyzdy ekenine toqtaldy.
– Abaı – uly aqyn ǵana emes, kemeńger oıshyl, áıgili aǵartýshy. Sondyqtan, Abaıǵa arnalǵan bústtiń bilim ordasyna qoıylýy oryndy sheshim ekeni sózsiz. Munyń sımvoldyq mán-mańyzy aıryqsha. Ol jurtty ǵylym ıgerýge, bilimdar bolýǵa úndedi. Jańashyldyq pen jasampazdyqty dáriptedi. Abaı murasy – bizdiń elimizge ǵana emes, barsha adamzatqa ortaq qundylyq. Dala danyshpanynyń «Adam balasy adam balasynan aqyl, ǵylym, ar, minez degen nárselermen ozbaq» degen sózi bar. Bul qasıetterdi koreı halqy da erekshe baǵalaıtynyn bilemiz. Osy qundylyqtardyń arqasynda qazirgi tańda Koreıa Respýblıkasy ozyq damyǵan memleketterdiń qataryna qosylyp otyr. Byltyr biz Abaıdyń 175 jyldyq mereıtoıyn atap óttik. Osyǵan oraı, kóptegen aýqymdy is-sharalar uıymdastyrdyq. Abaı shyǵarmalary álemniń birneshe tiline aýdaryldy. Sonyń ishinde, koreı tilinde «Altyn shańyraqta shyrqalǵan án» atty kitaby jaryqqa shyqty. Koreıada uly oıshylǵa arnalǵan markalar ázirlendi. Munyń bári eki eldiń rýhanı yntymaqtastyǵyn odan ári nyǵaıta túseri anyq, – dedi Memleket basshysy.
2010 jyl Qazaqstannyń Koreıadaǵy jyly dep jarıalansa, 2011 jyly Koreıanyń Qazaqstandaǵy jyly atap ótildi. Qasym-Jomart Toqaev osy sharalar arqyly barlyq baǵyttaǵy baılanystardyń arta túskenine toqtaldy.
– Ásirese, mádenı-rýhanı saladaǵy yntymaǵymyzdy nyǵaıttyq. Osyndaı tyǵyz qarym-qatynas bolashaqta da jalǵasyn tabady. Qazaqstannyń jetekshi oqý ornynda koreı tili oqytylyp keledi. Koreıalyq stýdentter de qazaq tilin oqyp júrgenin jaqsy bilemin. Bul, árıne, kóńil qýantarlyq erekshe jaǵdaı. Kóptegen qazaq jastary koreı ýnıversıtetterinde bilim alýda. Biz bilim, ǵylym jáne mádenıet salasyndaǵy yntymaqtastyqty odan ári jalǵastyra beremiz. Bul ózara baılanysty keleshekte de dostyq rýhta damyta túsýge jol ashady, – dedi Qazaqstan Prezıdenti.
Memleket basshysy sóziniń sońynda atsalysqan azamattarǵa shynaıy rızashylyǵyn bildirip, Abaı murasynyń Koreı halqynyń rýhanı áleminen ornyn tabatynyna senimdi ekenin aıtty.