Qaznette ınvestısıalyq jáne qarjylyq alaıaqtardyń is-áreketinen zardap shekkenderdiń barlyǵyna aqshany qaıtaryp beretin Qor jarnamasy taǵy da tarady.
Bul habarlamaǵa senbegen jón, ony Internet-qylmyskerler jasaǵan, dep habarlaıdy Almaty-akshamy.kz Stopfake.kz-ke silteme jasap.
Baǵdarlamany Qazaqstan prezıdenti Qasym-Jomart Toqaev iske qosqan eken. «Mamandar» 72 saǵat ishinde aldyn ala tólemsiz 500 myń teńgeden qaıtarýǵa daıyn.
Jarnamada «Qazaqstan halqyna» qory atalǵan. Bul memleket basshysynyń tapsyrmasymen 2022 jyldyń qańtarynda qurylǵan uıym. Alaıda qor densaýlyq saqtaý, bilim berý jáne áleýmettik qoldaý salasyndaǵy problemalardy sheshýmen aınalysady. Ol alaıaqtardan zardap shekkenderge kómektespeıdi, onyń aldyna mundaı mindet qoıylmaǵan.
Alaıaqtar Qordyń logotıpi men qurylymyn qoldana otyryp, uqsas saıt jasaǵan. Biraq muqıat qarasaq, portaldyń jalǵan ekendigin baıqaımyz. Muny domendik ataýynan, mátindegi qatelerden túsinýge bolady. Sonymen qatar, portal tegin Tilda saıt qurastyrýshysynyń kómegimen ázirlengen. Memlekettik organdardyń ınternet-resýrstaryn joǵary bilikti mamandar daıyndaıdy. Olar bul úshin tegin baǵdarlamalardy paıdalanbaıdy. Resmı paraqshalardy jasaǵanda eń aldymen qaýipsizdikke basa nazar aýdarylady, qarapaıym saıt qurastyrýshysy muny qamtamasyz ete almaıdy.
Alaıaqtardan zardap shekken qazaqstandyqtarǵa aqshany qaıtaratyn jańa baǵdarlama týraly aqparat QR Prezıdentiniń resmı portalynda joq.
«Jeke derekterińizdi qaldyrmas buryn barlyq aqparatty muqıat oqyp shyǵyńyz jáne taldańyz. Jalǵan saıttar aldap, aqshańyzdy ıemdený maqsatynda jasalady. Sizderdi tek resmı habarlamalarǵa ǵana senýge shaqyramyz! Jańalyqtardyń shynaıylyǵyn bizdiń portaldyń kómegimen tekserýge bolady. Kúmán keltirgen aqparatty t.me/stopfakechatkz Telegram-arnasyna jiberińiz», delingen Stopfake.kz aqparatynda.