Sýmgaıt qalasynyń ortalyq kósheleriniń birine Ahmet Baıtursynovtyń esimi berilgen.
Qazaqstan Prezıdenti Qasym-Jomart Toqaev pen Ázirbaıjan Prezıdenti Ilham Álıev keńeıtilgen quramda kelissózder júrgizdi, dep habarlaıdy Almaty-akshamy.kz.
Qasym-Jomart Toqaev pen Ilham Álıev qazaq-ázirbaıjan strategıalyq seriktestiginiń negizgi máselelerin talqylap, saıası, saýda-ekonomıkalyq, kólik-tranzıttik jáne mádenı-gýmanıtarlyq yntymaqtastyqty nyǵaıtýǵa erekshe nazar aýdardy.
«Qazaqstan men Ázirbaıjan – jaqyn memleketter, biz strategıalyq seriktespiz jáne odaqtaspyz. Búgin elderimiz arasyndaǵy strategıalyq qatynastardy nyǵaıtý jáne odaqtastyq ózara is-qımyldy tereńdetý týraly Deklarasıaǵa qol qoıylady», – dedi Memleket basshysy.
Qasym-Jomart Toqaev Ázirbaıjanǵa ekijaqty yntymaqtastyqty jańa deńgeıge shyǵarý úshin arnaıy mısıamen kelgenin aıtty. Qazaqstan Prezıdenti ekijaqty saýda-ekonomıkalyq baılanystardy damytý máselelerine egjeı-tegjeıli toqtaldy.
Keıingi jyldary taýar aınalymynyń aıtarlyqtaı, úsh esege jýyq óskenine qýanyshtymyn. Biraq bul, árıne, jaıbaraqat júrýge negiz emes ekenin atap ótkim keledi. Saýdany arttyrýǵa múmkindikter bar dep esepteımin. Bizdiń úkimetterimiz jaqyn arada elderimiz arasyndaǵy taýar aınalymyn 1 mıllıard dollarǵa deıin ulǵaıtý úshin jumys isteýi kerek, – dedi Memleket basshysy.
Qasym-Jomart Toqaev Ázirbaıjanda Prezıdent Ilham Álıevtiń basshylyǵymen júrgizilip jatqan aýqymdy saıası jáne áleýmettik-ekonomıkalyq reformalardy joǵary baǵalady.
Sonymen qatar Qazaqstan Prezıdenti gýmanıtarlyq yntymaqtastyqty damytýdyń qolaıly perspektıvalaryna nazar aýdardy.
«Meniń oıymsha, kelesi jyly eki el úkimetteri arasyndaǵy kelisim boıynsha biz Qazaqstanda Ázirbaıjan mádenıetiniń onkúndigin ótkize alamyz. Sizdiń elińizdiń mádenıetine úlken qyzyǵýshylyq bar. Biz Ázirbaıjan mádenıetiniń kórnekti ókilderin óz elimizde úlken iltıpatpen qabyldaımyz», - dedi Qasym-Jomart Toqaev.
Ilham Álıev Qazaqstan Prezıdentine Ázirbaıjanǵa kelýge shaqyrýdy qabyl alǵany úshin alǵys aıtty.
«Bul sapar bizdiń qarym-qatynasymyzdyń damýynyń bolashaǵy úshin úlken mańyzǵa ıe bolatynyna senimdimin. Eń aldymen, meni Qazaqstan Respýblıkasynyń eń joǵary «Altyn Qyran» ordenimen marapattaǵanyńyz úshin resmı delegasıanyń aldynda sizge taǵy da alǵys aıtamyn. Bul syılyqty qabyl alý - men úshin úlken mártebe. Men muny bizdiń halyqtarymyzdyń dostyǵy men baýyrlastyǵynyń dáleli jáne Ázirbaıjannyń qarym-qatynasymyzdy nyǵaıtý baǵytynda jasap jatqan jumystaryna berilgen joǵary baǵa dep bilemin. Sondaı-aq Qazaqstannyń Ázirbaıjanǵa syılyǵy – azat etilgen aýmaqtarda salynatyn balalardyń shyǵarmashylyq damý ortalyǵynyń tusaýkeseri ótti. Bul halqymyzǵa degen baýyrmaldyq kózqarastyń taǵy bir kórinisi - Qarabaqty qalpyna keltirýge qosqan úles», – dedi Ázirbaıjan Prezıdenti.
Ázirbaıjan basshysy búgin ekijaqty qarym-qatynastardyń keń aýqymdy kún tártibi men halyqaralyq máseleler boıynsha jan-jaqty áńgime bolǵanyn atap ótti.
«Árıne, kólik-logıstıka ınfrraqurylymyn damytý jóninde úlken josparymyz bar. Qazaqstanda da, Ázirbaıjanda da osy ınfraqurylymdy qurý boıynsha ýaqtyly sharalar qabyldandy. Qazir elderimiz arasyndaǵy júk tasymalynyń kólemin jáne kólik tranzıtin arttyrý jóninde bastama kóterilip jatyr. Tıisti organdar bul baǵytta ózara belsendi jumys atqaryp otyr. Saýda-ekonomıkalyq qatynasty damytýǵa da tyń serpin beretinimizge senimdimin. Taýar aınalymyn arttyrýdaǵy rezervimiz aıtarlyqtaı kóp. Búgin biz keleshektegi saýda-ekonomıkalyq yntymaqtastyǵymyzdyń birqatar baǵyty boıynsha pikir almastyq. Ózara taýar jetkizý kólemin arttyrý josparyn naqtylaı alamyz. Sondaı-aq ınvestısıa salasynda zor múmkindigimiz bar. Qazaqstanda da, Ázirbaıjanda da qolaıly ınvestısıalyq klımat qalyptasqan. Sheteldik ınvestısıanyń kólemi úlken. Osy baǵyttaǵy kúsh-jigerimizdi biriktirip, Qazaqstan men Ázirbaıjandaǵy, sonymen qatar ózge de elderdegi birlesken ınvestısıalyq jobalarǵa qatysatyn ýaqyt keldi dep oılaımyn», – dedi Ilham Álıev.
Sonymen qatar Ázirbaıjan Prezıdenti jaqynda Sýmgaıt qalasynyń ortalyq kósheleriniń birine qazaq halqynyń kórnekti azamaty, aǵartýshy, túrkitanýshy Ahmet Baıtursynovtyń esimi berilgenin eske saldy. Ol baýyrlas eki el arasyndaǵy qarym-qatynas tabysty damıtynyna senim bildirdi.