Prezıdent Qasym-Jomart Toqaev Qazaqstan halqyn Jańa 2026 jylmen quttyqtady, - dep habarlaıdy aqshamnews.kz tilshisi.
Aqordanyń baspasóz qyzmeti Prezıdenttiń Qazaqstan halqyna arnaǵan jańajyldyq quttyqtaý sóziniń mátinin jarıalady.
"Qymbatty otandastar! Biz birneshe mınýttan keıin Jańa jyldy qarsy alamyz. Tól tarıhymyzdyń taǵy bir belesine qadam basamyz. Jurtymyz Jańa jyldy erekshe kóńil-kúımen kútedi. Ár adam osy sátte arman-tilegin aıtady. Eski jyldyń eń áserli sátterin eske alady. Bolashaqqa jospar quryp, zor úmit artady. 2025 jyl halqymyz úshin mereıli jyl boldy. Elimiz damýdyń dańǵyl jolyna tústi. Álemdegi ahýal kúrdeli bolsa da, ekonomıkamyz órkendep, ishki jalpy ónim 6 paıyzdan asty. Qazaqstannyń altyn-valúta qory 62 mıllıard dollardan asty. Elge aýqymdy ınvestısıa tartyp, birqatar iri jobany júzege asyrdyq. "Dostyq – Moıynty" temirjolynyń ekinshi jelisi iske qosyldy. Bul – Táýelsizdik kezeńindegi eń iri temirjol qurylysy. Sondaı-aq on úsh myń shaqyrym avtokólik joly salynyp, jóndelip jatyr. Sonyń arqasynda Qazaqstannyń tranzıttik áleýeti arta tústi.
Dıqandarymyz ekinshi jyl qatarynan mol ónim alyp, qambany astyqqa toltyrdy. Aýyldy jáne aýyl sharýashylyǵyn damytýǵa basa mán berip jatyrmyz. Sharýalarǵa buryn-sońdy bolmaǵan qarjylaı qoldaý kórsetildi, ıaǵnı 1 trıllıon teńge osy maqsatqa jumsaldy. Bıyl jalpy aýmaǵy 19 mıllıon sharshy metrden astam turǵyn úı salyndy. Myńdaǵan otbasy baspanaly boldy. Áleýmettik salada kóp sharýa jasaldy. Júzden astam mektep, eki júzge jýyq densaýlyq saqtaý nysany boı kóterdi. Álemniń úzdik joǵary oqý oryndarynyń fılıaldary ashyldy. Adam quqyqtaryn qorǵaýǵa basa mán berilip jatyr. Qoǵamda "Zań men tártip" qaǵıdaty ornyǵa tústi, azamattarymyzdyń quqyqtyq sana-sezimi kúsheıýde.
Biz ár jetistikke jurtymyzdyń eren eńbeginiń arqasynda jettik. Azamattarymyz bilim, ǵylym, mádenıet salalarynda bıik belesterdi baǵyndyrdy. Olar halqymyzdy rýhy asqaq, zıatker ult retinde tanytýǵa zor úles qosty. Oqýshylarymyz halyqaralyq bilim saıystarynda top jardy. Sportshylarymyz álemdik dodalarda úzdik shyqty, Kók týymyzdy jelbiretti. Bıyl biz "Jumysshy mamandyqtary jylyn" atap óttik. Eńbek adamdaryna aıryqsha qurmet kórsettik. Bul úrdis aldaǵy ýaqytta da jalǵasyn tabady. Memleket muǵalimder men dárigerlerge jan-jaqty qoldaý kórsetti jáne osy saıasat uzaqmerzimdi strategıalyq sıpatqa ıe boldy. Elimizdiń mádenıet jáne ǵylym qaıratkerlerine jan-jaqty qoldaý kórsetildi. Adal eńbektiń qadirin biletin ulttyń keleshegi de jarqyn bolmaq. Óz kásibiniń naǵyz mamany bolǵan otanshyl azamattar elimizdiń kóshin alǵa bastaıdy. Osylaısha, HHİ ǵasyrdyń birinshi shıregin abyroımen aıaqtadyq. Ekonomıkalyq jáne áleýmettik kórsetkishter boıynsha Qazaqstan osy saıası-geografıalyq keńistikte kósh bastady.
Bárimiz bir el bolyp Ádiletti, Qaýipsiz, Kúshti, Taza, Ozyq Qazaqstandy quryp jatyrmyz. Endi, mine jylqy jylyna aıaq basqaly turmyz. Qazaq úshin qazanattyń orny qashanda bólek. Halqymyz "Jylqy jyly jaıly bolady" dep yrymdaıdy. Biz kelesi jyldan kóp jaqsylyq kútemiz. Órkenıetti ult retinde alysqa kóz tigemiz. Alǵa qoıǵan bıik maqsatymyz jáne naqty josparymyz bar.
2026 jyly Qazaqstan jańǵyrýdyń jańa kezeńine qadam basady. Elimizdiń jarqyn keleshegi úshin aldaǵy konstıtýsıalyq reformanyń mán-mańyzy zor. Azamattarymyz Qazaqstannyń ósip-órkendeýine tyń serpin beretin bul reformany qoldaıdy dep senemin. Biz energetıkalyq áleýetimizdi nyǵaıtyp, agroónerkásip kesheni, sý sharýashylyǵy máselelerin sheship, kólik-logıstıka salasyn jáne turǵyn úı-kommýnaldyq sharýashylyǵynyń ınfraqurylymyn damyta beremiz. Shaǵyn jáne orta bıznes árdaıym memlekettiń nazarynda bolady. Barlyq óńirde jańa kásiporyndar ashylyp, joldar jóndeledi, sondaı-aq turǵyn úıler, mektepter, densaýlyq saqtaý, sport jáne mádenıet nysandary boı kóteredi. Men bıylǵy Joldaýymda Sıfrlyq memleket bolýymyz kerektigin jarıaladym. Sondyqtan kelesi jyldy Sıfrlandyrý jáne jasandy ıntellekt jyly dep ataý týraly sheshim qabyldadym. Ozyq tehnologıalar elimizdiń barlyq saladaǵy áleýetin arttyrýǵa jol ashpaq.
Óskeleń urpaqqa qamqorlyq kórsetý – basty mindetimiz. Meniń bastamammen júzege asyrylyp jatqan "Ulttyq qor – balalarǵa" jobasy aıasynda osymen úshinshi jyl qatarynan ár balanyń esepshotyna qarajat túsedi. Memleket óziniń áleýmettik mindettemelerin oryndaı beredi. Biz bilim berý jáne densaýlyq saqtaý salalaryn damytýǵa árdaıym aıryqsha nazar aýdaramyz.
Biz memlekettik mańyzy aıryqsha "Taza Qazaqstan" jobasyn bir qoǵam bolyp júzege asyra beremiz. Aýyldarymyz ben qalalarymyz taza, jasyl jelegi mol ári ómir súrýge qolaıly bolýǵa tıis. Bul Táýelsizdiktiń 35 jyldyǵyna oraı el damýyna qosqan eń úlken úlesimiz bolmaq. Biz osy tarıhı mejeni naqty ispen atap ótemiz.
"Birligimiz – áralýandyqta" degen qaǵıdatqa negizdelgen qoǵamdyq kelisim men turaqtylyq – barlyq jetistigimizdiń bastaýy. Memleket aldaǵy ýaqytta da halyqaralyq quqyqqa jáne ult múddesine saı keletin syndarly ári baıypty syrtqy saıasat júrgizedi. Qazaqstannyń usynysymen Birikken Ulttar Uıymy 2026 jyldy Halyqaralyq eriktiler jyly dep jarıalady. Halyqaralyq eriktiler qozǵalysy tileýlestik, meıirimdilik syndy myzǵymas adamgershilik qundylyqtaryn pash etedi. Bul – bizdiń de halqymyzǵa tán asyl qasıetter.
Jańa jyldyń mańyzdy ózgeristerge toly jyl bolary sózsiz. Bul ózgeristerdiń qanshalyqty jemisti bolatyny ózimizge baılanysty. Biz bárimiz tabandy eńbek etýimiz kerek, sonda ǵana elimiz zor tabystarǵa jetedi. Bul, eń aldymen, halqymyzǵa qajet.
Qadirli dostar! Dál qazir Jańa jyldy jumysta qarsy alyp jatqan azamattarymyz bar. Bul – óz isine adaldyq pen qoǵam aldyndaǵy jaýapkershiliktiń jarqyn kórinisi. Men Sizderdiń tabandy eńbekterińizdi joǵary baǵalaımyn. Sizderge arnaıy quttyqtaýymdy joldaımyn. Elimizdi kórkeıtýge úles qosyp júrgen barsha azamatqa zor alǵys aıtamyn. Shyn máninde, týǵan elge qyzmet etýden artyq baqyt joq. Halqymyz "Yntymaq bar jerde – yrys bar" deıdi. Sondyqtan berekeli birligimizdi saqtap, birtutas ult bolyp elimizdi damyta bereıik. Búgin osy erekshe sátte jastar men balalarǵa úndeý joldaǵym keledi. Qazir – múldem jańa qubylystar jáne zor múmkindikter dáýiri. Árkim, eń aldymen, ózine, boıyndaǵy kúshi men qabiletine senýi kerek. Uly Abaıdyń "Ózińe sen, ózińdi alyp shyǵar, eńbegiń men aqylyń eki jaqtap" degen sózi árdaıym ózekti. Belsendi, bilimdi, eńbekqor, tártipti, ushqyr bolyńyzdar. Joldaryńyz ashyq bolsyn! Árqashan alar asýlaryńyz bıik bolsyn! Elimizdiń ár azamatyna zor densaýlyq, amandyq jáne tabys tileımin! Tórt qubylamyz túgel bolsyn! Ár shańyraq jaqsylyqqa tolsyn! Kók týymyz máńgi jelbiresin! Otanymyz – Qazaqstan Respýblıkasy, Qazaq Eli jasaı bersin! Jańa jyl qutty bolsyn!" - dedi Prezıdent.