Qyzylordada ótken Ūlttyq qūryltaıdyń besínshí otyrysy – el damuynyń jańa kezeńíne bastar taǵdyrly sátterdíń bírí boldy. Memleket basshysy Qasym-Jomart Toqaevtyń bastamasymen qaıta jańǵyrǵan būl jalpyūlttyq dıalog alańy qysqa uaqyt íshínde el taǵdyryn aıqyndaıtyn strategıyalyq sheshímder qabyldanatyn, qoǵam men memlekettíń shynaıy sūhbaty ornyqqan mańyzdy ınstıtutqa aınaldy.
Eldík mání bar máselelerdíń dál Syr boıynda talqylanuy – shaharymyzdyń tarıhtaǵy, ruhanıyattaǵy jáne qazírgí áleumettík-ekonomıkalyq damuyndaǵy erekshe ornyna berílgen joǵary baǵa. Būl – óńírge kórsetílgen sením ǵana emes, el bolashaǵyn bírge aıqyndauǵa shaqyrǵan jauapkershílík.
Memleket basshysynyń 2025 jylǵy 30 qazandaǵy jūmys sapary Qyzylordanyń damuy sóz júzínde emes, naqty ístermen dáleldeníp kele jatqanyn kórsettí: ınfraqūrylym jańaryp, bílím men mádenıetke serpín berílíp, adamı kapıtaldy damytuǵa baǵyttalǵan júıelí sayasat berík jolǵa qoıyldy.
Ūlttyq qūryltaıdyń otyrysynda kóterílgen ınstıtutsıonaldyq reformalardy eldíń sayası mádenıetín jańa sapalyq deńgeıge kóteruge baǵyttalǵan mańyzdy árí uaqyt talabyna saı qadamdar dep baǵalaımyz. Jańa Parlamenttíń ókílettíkterín naqtylau, Prezıdent Ákímshílígín jańǵyrtu, apparattyq qūrylymdardy ońtaılandyru jáne vıtse-prezıdent ınstıtutyn engízu jóníndegí bastamalar bılík tarmaqtary arasyndaǵy jauapkershílík pen basqaru tıímdílígín arttyruǵa negízdelgen salmaqty sheshímder ekení anyq. Būl bastamalar «kúshtí ınstıtuttar – jauapty memleket» qaǵıdatynyń naqty ís júzíndegí kórínísí bolyp tabylady.
Sondaı-aq Qūryltaıda kóterílgen tsıfrlandyru men jasandy ıntellekt máselelerí bílím beru júıesíne tíkeleı qatysty. Qazírgí unıversıtet tek bílím taratushy emes, tehnologıyalyq ózgerísterdíń qozǵaushy kúshí boluy qajet. Osy tūrǵyda Memleket basshysynyń tsıfrlyq transformatsıyaǵa belsendí qatysu turaly ūstanymy joǵary bílím beru salasynyń damu baǵytymen tolyq úndesedí.
Qoǵamdyq kelísímdí nyǵaıtu maqsatynda Qazaqstannyń Halyq Keńesín qūru bastamasy da – azamattyq qoǵamnyń rólín arttyruǵa baǵyttalǵan mańyzdy qadam. Keń ókíldílíkke negízdelgen būl alań halyqtyń ártúrlí toptarynyń píkírín eskeruge múmkíndík beredí dep senemín.
Ūlttyq qūryltaı el damuynyń jańa sapalyq kezeńíne jol ashqan, sayası reformalar, adamı kapıtal jáne ornyqty damu máselelerí toǵysqan mańyzdy ūlttyq alań ekenín taǵy bír márte dáleldedí. Mūndaı formattaǵy ashyq dıalog qoǵamnyń memleketke degen senímín arttyryp, bolashaqqa baǵyttalǵan ortaq jauapkershílíktí kúsheıtedí.