Qaraǵandy Qazaqstandaǵy eń las qala retinde tanyldy. Mundaı qorytyndyny "Qazgıdromet" mamandary júrgizgen zertteý nátıjesi kórsetti, - dep habarlaıdy aqshamnews.kz tilshisi.
Jelsiz kúnderi qaladaǵy aýa lastanýynyń deńgeıi ruqsat etilgen shekti mólsherden 24 esege deıin asyp ketýi múmkin. Ekologtardyń pikirinshe, lastanýdyń negizgi sebepteriniń biri - jeke úılerdiń sapasyz kómirmen pesh jaǵýy.
Jeke sektor turǵyny Evgenıı Medvedev keıingi jyldary peshtiń tútini áldeqaıda qoıýlanyp ketkenin aıtady. Onyń baqylaýynsha, sapaly kómir tabylsa, tútin az bolady, alaıda kóbine ashyq ádispen óndirilgen kómir satylyp jatady. Mundaı kómir jylýdy az beredi de, tútini kóp bolady.
"Úsh jyl buryn 110 m² úıdi bir maýsym jylytýǵa shamamen 5 tonna kómir ketetin. Al qazir byltyr 10 tonna jumsadym. Bul neni bildiredi? Kómirdiń sapasy nasharlaǵan", - deıdi Medvedev.
Turǵyndar qysta úı jylytýǵa 300 myń teńgege deıin aqsha shyǵaryp, sonymen qatar, amalsyzdan aýany lastap otyr. Evgenııdiń aıtýynsha, peshte qalatyn kúldiń kólemi de kóbeıgen: buryn bir shelek qana shyqsa, qazir úsh shelekke deıin jınalady.
"Ne istemedim deısiz… Kómirdi keptirip kórdim, qurǵaq kezde erterek kirgizip, tundyryp qoıdym - báribir eshteńe ózgermedi", - deıdi qala turǵyny.
Ekologtar jaǵdaı jyl saıyn ýshyǵa beredi dep sanaıdy, óıtkeni búgingi kúni halyqqa kómir satý salasy rettelmegen, baqylaýsyz naryqty eske salady.
"Kómir sapasyn memlekettik baqylaýdyń júıesi joǵalǵan. Kómir satýshylar kóp jyldan beri kóshirme kúıinde júrgen “sertıfıkattardy” kórsetedi, onyń qandaı kómirge, qaı jerde berilgeni belgisiz. Al naqty baqylaý - oryndarda tekserý, baqylaý maqsatyndaǵy satyp alý, zerthanalyq taldaýlar - múlde júrgizilmeıdi", - deıdi Qaraǵandydaǵy "EKOMÝZEI" uıymynyń damý jónindegi dırektory Dmıtrıı Kalmykov.