Qaraǵandyda esírtkí aınalymy men kontrabandasyna qatysty ís boıynsha úkím shyqty, - dep habarlaıdy aqshamnews.kz tílshísí.
Qaraǵandyda esírtkí zattarynyń zańsyz aınalymy jáne kontrabandasyna baılanysty qylmystyq ís qaralyp, sot úkímí jarıyalandy. Tergeu jūmystary Bas kólík prokuraturasynyń úılestíruímen Qarjy monıtorıngí agenttígíníń (QMA) Qaraǵandy oblysy boıynsha departamentí tarapynan júrgízílgen.
Tergeu málímetínshe, kolledj studentteríníń bírí esírtkí taratudan tabys tabuǵa bolatynyn bílíp, "Telegram" messendjerí arqyly belgísíz kuratormen baılanysqa shyqqan. Ol "jasyrma-kurer" jáne "qoıma" qyzmetín atqaruǵa kelísíp, tapsyrmalar alǵan.
Aıyptalushynyń míndetíne berílgen koordınatalar boıynsha esírtkí zattaryn alyp ketu, saqtau, bólíp orau, tasymaldau jáne qala aumaǵynda aldyn ala belgílengen jasyryn oryndarǵa ornalastyru kírgen. Tergeu deregíne sáıkes, ol kúníne shamamen 30 jasyrma jasaǵan.
Sonymen qatar, sottalushy Taılandtan Qazaqstanǵa halyqaralyq poshta jóneltímí arqyly esírtkí jetkízudí ūıymdastyrǵany anyqtaldy. Būl maqsatta ol "Telegram" arqyly 400 myń teńge syıaqy ūsyna otyryp, kámeletke tolmaǵan "dropperdí" tartyp, jóneltímdí onyń atyna rásímdegen.
Kúdíktí tauardy alu kezínde ūstalyp, odan 909 gramm kannabıs ekstrakty tárkílendí. Tíntu barysynda onyń tūrǵylyqty mekenjaıynan qosymsha 80 gramm esírtkí zaty tabylyp, alynǵan.
Sondaı-aq, ūyaly telefonyn tekseru kezínde onyń bír kún būryn bírneshe jasyrma ornalastyrǵany belgílí boldy. Kórsetílgen koordınatalar boıynsha taǵy 3,34 gramm kannabıs ekstrakty tárkílendí.
Sot úkímímen aıyptalushy 15 jyl merzímge bas bostandyǵynan aıyryldy. Úkím ázírge zańdy kúshíne engen joq.