Bul týraly "Qazaq tili" qoǵamynyń Raýan Kenjehanuly aıtty.
Prezıdent qorǵa óz qaltasynan 7 mln teńge aýdardy, dep habarlaıdy Almaty-akshamy.kz
Qordyń basty mindeti – memlekettik tildi qoldaý jáne damytýmen aınalysatyn "Qazaq tili" qoǵamynyń turaqty ári uzaqmerzimdi damýyn qamtamasyz etý
Qazaqstan prezıdenti Qasym-Jomart Toqaev memlekettik tildi damytýǵa arnalǵan Qazaq tili qoryna alǵashqy bolyp 7 mıllıon teńge aýdardy. Bul týraly "Qazaq tili" qoǵamynyń prezıdenti, Ulttyq quryltaıdyń múshesi Raýan Kenjehanuly habarlady.
Raýan Kenjehanuly prezıdenttiń qabyldaýynda bolǵanda memlekettik tildi damytýǵa arnalǵan endaýment qoryn qurýdy usynǵanyn eske saldy. Aıtýynsha, prezıdent usynysty qoldaǵan.
"QAZAQ TILI Endowment qoryn qurý, tirkeý, rásimdeý sharalary jaqynda aıaqtalyp, búgin Qasym-Jomart Kemeluly sol qorǵa birinshi bolyp 7 mıllıon teńge kóleminde jeke jarna aýdardy. Prezıdent kórsetken úlgini el azamattary, til janashyrlary, kásipkerler keńinen qoldaıdy dep senemiz", - dep jazdy ol áleýmettik jelidegi paraqshasynda.
"Qazaq tili" qoǵamynyń prezıdenti Toqaevqa ana tilimizge degen adal azamattyq ustanymy, kórsetken zor qurmeti, jeke úlgisi úshin alǵys bildirdi.
Qordyń basty mindeti – memlekettik tildi qoldaý jáne damytýmen aınalysatyn elimizdegi eń iri uıym "Qazaq tili" qoǵamynyń turaqty ári uzaqmerzimdi damýyn qamtamasyz etý. Endaýment qorynyń ereksheligi – qorǵa jınalǵan qarjy jumsalmaıdy. Qordaǵy qarajat basqarýǵa beriledi jáne ınvestısıaǵa quıylady. Investısıalyq qyzmetten túsken tabys "Qazaq tili" qoǵamynyń jarǵylyq mindetterine jumsalady.
Raýan Kenjehanuly álem elderinde bilim berý men áleýmettik baǵytta jumys isteıtin qoǵamdyq uıymdardyń turaqty ári uzaqmerzimdi qyzmetin qamtamasyz etý úshin endaýment qoryn qurý tájirıbesi keń taralǵanyn atap ótti.
Qazir Japonıadaǵy ǵylym men tehnologıa qory, sonymen qatar, Stenford, Garvard ýnıversıtetteriniń qorlary dúnıe júzindegi eń iri endaýment qorlarynyń qataryna kiredi. Qazaqstanda da iri ýnıversıtetter, mektepter men komersıalyq emes uıymdardyń endaýment qorlary sátti jumys istep keledi.
Onyń aıtýynsha, Qazaq tili Endowment qoryn bedeldi qoǵam qaıratkerleri, ǵalym-lıngvıster men memleket ókilderinen quralǵan táýelsiz qamqorshylar keńesi baqylaıdy.
Memleket basshysy "Qazaq tili" qoǵamyna qazaq tilindegi medıa jáne baspa kontentin kóbeıtý úshin naqty jobalar men sharalar keshenin júzege asyrý, tildi oqytý men úıretý ádistemesin jetildirý, oqý saýattylyǵy men jazý mádenıetin damytý, sonymen qatar, qazaq tilin qoldaý men tildi qoldanatyn qaýymdastyq aıasyn keńeıtý maqsatynda zamanaýı tehnologıalyq sheshimderdi keńinen paıdalanýdy tapsyrǵan.