Ankara sońǵy 15 jylda Qazaqstanǵa 4,35 mlrd dollar ınvestısıa quıdy
Qazaqstan men Túrkıa arasyndaǵy saýda aınalymyn 10 mlrd dollarǵa jetkizý kerek. Bul týraly Qazaqstan men Túrkıa arasyndaǵy joǵary deńgeıdegi strategıalyq yntymaqtastyq keńesiniń 4-shi otyrysynda Memleket basshysy Qasym-Jomart Toqaev aıtty, dep habarlaıdy Almaty-akshamy.kz QazAqparatqa silteme jasap.
«Búgin shaǵyn quramda bolǵan kelissózimiz baýyrlastyq rýhynda ótti. Sizben ekijaqty jáne kópjaqty yntymaqtastyqty, sondaı-aq mańyzdy halyqaralyq máselelerdi talqyladyq. Yqpaldastyqtyń basym baǵyttaryna tyń serpin berýge kelistik. Saýda-ekonomıkalyq jáne ınvestısıalyq yntymaqtastyq qarqyndy damyp jatqanyn atap óttik. Endi aldymyzda turǵan maqsat - saýda aınalymyn 10 mlrd dollarǵa jetkizý», - dedi Qasym-Jomart Toqaev Túrkıa Prezıdenti Rejep Taııp Erdoǵanǵa qarata.
Memleket basshysynyń dereginshe, Ankara sońǵy 15 jylda Qazaqstanǵa 4,35 mlrd dollar ınvestısıa quıdy.
Al Qazaqstan Túrkıaǵa 1,13 mlrd dollar qarjy saldy. Túrkıa Qazaqstannyń eń iri 10 ınvestorynyń qatarynda tur.
«Jalpy, ekijaqty saýda-sattyq áleýetin arttyrý jolynda tranzıttik tasymal baǵyttary mańyzdy ról atqarady. Biz tasymal shyǵynyn azaıtyp, jetkizý merzimin qysqartý úshin Transkaspıı dálizin damytýǵa shaqyramyz. Bul másele boıynsha biz búgin pikir almastyq. Kózqarasymyz birdeı», - dedi QR Prezıdenti.