Quny 500 mıllıon dollardan asady.
Qazaqstan prezıdenti sırek kezdesetin metaldar boıynsha óńirlik zertteý ortalyǵyn qurýdy usyndy, dep habarlaıdy aqshamnews.kz
Búgin Aqordada Ortalyq Azıa memleketteri basshylary men Germanıa Federaldyq kansleriniń kezdesýi ótti. Sol jerde Qazaqstan prezıdenti Germanıa kompanıalaryn sırek kezdesetin metaldardy geologıalyq barlaý jáne ıgerý jumystaryn birge júrgizýge shaqyrdy. Al seriktestik baılanystardy "shıkizatty tehnologıaǵa aıyrbastaý" qaǵıdaty boıynsha ornatýǵa bolady.
"Osy oraıda HMS Bergbau kompanıasynyń Shyǵys Qazaqstan oblysynda lıtııdi ıgerý jáne óńdeý boıynsha ınvestısıalyq jobany iske asyrýyn quptaımyz. Onyń quny 500 mıllıon dollardan asady. Biz elimizdiń aýmaǵynda baǵaly jáne tústi metaldardyń ken ornyn barlap, ıgerý úshin germanıalyq ınvestorlarǵa qolaıly jaǵdaı jasaýǵa daıynbyz. Eýropalyq seriktesterimizdiń qoldaýymen Qazaqstannyń Tehnologıalyq boljaý ortalyǵy bazasynan sırek kezdesetin metaldar boıynsha óńirlik zertteý ortalyǵyn qurǵan jón dep sanaımyz",-dedi Toqaev.
Qazaqstan kólik-logıstıka salasyndaǵy baılanysty nyǵaıtý máselesine de basa mán berip otyr. "Orta dálizdi" odan ári damytýdyń ınvestısıalyq turǵydan bolashaǵy zor.
"Qazaqstan Global Gateway baǵdarlamasy aıasynda "Orta dálizdi" damytý úshin eýropalyq seriktesterdiń 10 mıllıard eýro bólý týraly sheshimin quptaıdy. Osy baǵytty Transeýropalyq kólik jelisimen jáne Global Gateway strategıasymen ushtastyrýda Germanıa tarapy qoldaý kórsetedi dep senemiz", -dedi prezıdent.