Jarlyqta júıeli jáne qoldanbaly sharalar kesheni qarastyrylǵan.
Qasym-Jomart Toqaev memlekettik apparattyń qyzmetin búrokratıadan aryltý týraly Jarlyqqa qol qoıdy, dep habarlaıdy Almaty-akshamy.kz Aqordaǵa silteme jasap.
Prezıdent «Memlekettik apparattyń qyzmetin búrokratıadan aryltý sharalary týraly» Jarlyqqa qol qoıdy. Búrokratıadan aryltýdyń negizgi qaǵıdattary forma mániniń basymdyǵyn, bastapqy qalpy boıynsha sıfrlandyrýdy, basqarýshylyq jaýapkershilikti, úzdiksiz jetildirýdi, reglamentteýdiń ońtaılylyǵyn aıqyndaıdy. Jarlyqta júıeli jáne qoldanbaly sharalar kesheni qarastyrylǵan.
Bul sharalardyń júzege asyrylýy memlekettik apparatta sheshimderdiń qabyldanýyn jyldamdatady, memlekettik organdardaǵy birinshi basshylardyń derbestigi men jeke jaýapkershiligin arttyrady, qujat aınalymy men esep berýshilikti qysqartady.
Atap aıtqanda, júktelgen mindetterdi jyldam júzege asyrý úshin memlekettik organdarǵa normatıvtik quqyqtyq aktilerdi ózderiniń fýnksıalaryn zańnamalyq deńgeıde naqtylap jatpaı-aq qabyldaýǵa quqyq beriledi. Keshendi reınjınırıng negizinde norma shyǵarý jáne búdjet úderisteriniń merzimderi men kezeńderi eki ese qysqarady.
Sonymen qatar vedimistik esep berý isin júıeleý jáne avtomattandyrý; aqparattyq júıelerde bar málimetterdi memlekettik organdardyń suratýyna tyıym salynady; qaǵaz túrindegi qujattarǵa buryshtama soǵý jáne olardyń paraqtaryna aldyn ala qol qoıý joıylady; ókilettikterdi orta deńgeıdegi basqarý býynyna berý; qashyqtan jumys isteý úshin memlekettik organdardyń basshylaryn quraldarmen qamtamasyz etip, jaǵdaı jasaý jáne basqa da máseleler qarastyrylady.
Búrokratıadan aryltý isinde memlekettik basqarýdyń barlyq salasyn sıfrlyq transformasıalaý jáne júıelik reınjınırıngteý mańyzdy sanalady. Bul jumystardyń negizgi benefısıarlary azamattar bolady. Budan bólek Jarlyqta qamtylǵan sharalar túpkilikti nátıjege áser etpeıtin, biraq memlekettik qyzmetshilerdi qajetsiz rásimder men úderisterden bosatýǵa múmkindik beredi, sondaı-aq Memleket basshysynyń saıası jáne ekonomıkalyq reformalaryn memlekettik apparattyń tıimdi júzege asyrýyn qamtamasyz etedi.