Prezıdent Kókshetaý qalasynyń 2050 jylǵa deıingi Bas josparymen tanysty, - dep habarlaıdy Aqshamnews.kz tilshisi.
Qasym-Jomart Toqaevqa Bas jospar aıasynda jylý elektr ortalyǵy, oblystyq kópbeıindi aýrýhana, Azamattyq qorǵanys akademıasy jáne kópfýnksıonaldy sport kesheni salynyp jatqany jóninde baıandaldy. Budan bólek, alpysqa jýyq ónerkásip kásipornyna eseptelgen ındýstrıalyq aımaqtyń negizi qalanýda.
Oblys ortalyǵynyń aýmaǵy 7 myń gektarǵa ulǵaıady. Bas jospardaǵy erekshe nysannyń biri – Qopa kóliniń jaǵasynda boı kóteretin zamanaýı iskerlik ortalyq. Onda turǵyn úı keshenderi, bıznes jáne saýda ortalyqtary, áleýmettik nysandar men qoǵamdyq keńistikter ornalasady.
Mejeli ýaqytqa deıin qala halqynyń sany 500 myńǵa jetedi dep josparlanyp otyr. Turǵyndarǵa qolaıly jaǵdaı jasaý úshin jańa qurylys alańdary jáne renovasıa baǵdarlamasy aıasynda 10 mıllıon sharshy metrge jýyq turǵyn úı paıdalanýǵa berilmek.