Kerman qalasynda bolǵan lańkestiktiń kesirinen kóp adam qaza boldy.
Memleket basshysy Iran Islam Respýblıkasynyń Prezıdenti Ibrahım Raısıge kóńil aıtý jedelhatyn joldady, dep habarlaıdy Almaty-akshamy.kz Aqordaǵa silteme jasap.
Qasym-Jomart Toqaev Irannyń Kerman qalasynda bolǵan lańkestik áreket saldarynan kóptegen adamnyń qaza tabýyna baılanysty Ibrahım Raısıge kóńil aıtty.
«Kerman qalasynda bolǵan lańkestik áreket saldarynan júzdegen adamnyń qaza tapqany jáne jaraqat alǵany týraly sýyt habardy tereń kúızelispen qabyl aldym. Osyndaı aýyr sátte qaıǵy-qasiretterińizge ortaqtasyp, barsha qazaqstandyqtardyń jáne jeke óz atymnan Sizge, jaqyndarynan aıyrylǵan azamattarǵa, sondaı-aq búkil Iran halqyna kóńil aıtamyn», – dep jazylǵan jedelhatta.
Memleket basshysy baqılyq bolǵandardyń jandary jánnatta bolýyna, al zardap shekkenderdiń tezirek saýyǵyp, otbasylaryna aman-esen oralýyna tilektestik bildirdi.